प्रदर्शित होताच ‘तांडव’ वादाच्या भोवऱ्यात, वेबसीरीज बंद करण्याची मागणी

मुक्तपीठ टीम

कोरोना संक्रमणाचा प्रभाव बॉलिवूड चित्रपटसृष्टीवरही पडला होता. मात्र, आता हळुहळु सगळ स्थिरावत असताना चित्रपटसृष्टीलाही चालना मिळत आहे. तसेच चित्रपटगृहात जाऊन चित्रपट पाहणे पसंत केल जात नसल्याने आता ऑनलाइनच चित्रपट आणि वेबसीरीज पाहण्यास सुरूवात झाली आहे. त्यात आता बहुचर्चित ‘तांडव’ वेबसीरीज नुकतीच प्रदर्शित झाली आहे. परंतु ही वेबसीरीज प्रदर्शित होताच वादाच्या भोवऱ्यात सापडली. ॲमेझॉन प्राईमवर रिलीज झालेल्या या वेबसीरीजला सध्या सोशल मिडियावर बरेच ट्रोल केले जात आहे. हिंदूंच्या देवतांचा अपमान करण्यात आल्याचा आरोप या वेबसीरीजवर केला जात आहे. हा संपूर्ण प्रकार सीरीजमधील एका सीनमुळे घडला आहे. या सीनमध्ये बॉलिवूड अभिनेता मोहम्मद जीशान अयूब स्टेडवर भगवान शंकरांची भूमिका करत आहेत. अशावेळी आणखी एक व्यक्ती स्टेजवर येते. त्यानंतरचं सगळे स्किट हे जेएनयू शी जोडले गेले आहे.

याचदरम्यान भगवान शंकरांची भूमिका करत असलेला अभिनेता जीशान अयूब शिवी देतो. त्यामुळे या सीरिजवर चारही बाजूंनी टीकेची झोड उठवली जात आहे. या व्हिडिओवरून चाहत्यांनी आपला विरोध दर्शवला आहे. हिंदू संघटना देखील या व्हिडिओमुळे नाराज आहेत.

या वेबसीरीजमध्ये सैफ अली खान, डिंपल कपाडिया, तिग्मांशु धूलिया, सुनिल ग्रोवर यांसारखी बडी स्टारकास्ट आहे. ही वेबसीरीज ॲमेझॉन प्राईम वर रिलीज करण्यात आली आहे. रिलीज होताच अनेकांनी या वेबसीरीजवर आपले मत व्यक्त करण्यास सुरुवात केली आहे. काहींना ही वेबसीरीज पसंतीस उतरली तर काहींना यावर तीव्र रोष व्यक्त केला. हिंदुंच्या भावना दुखावल्याचा आरोप ठेवत, रविवारपासून ट्विटरवर तांडव बॉयकट, तांडवा सिरिजचे प्रदर्शन बंद करा अशी मागणी केली जात आहे.

तसेच ट्विटरवर #BanTandavNow ट्रेंड सुरु झाला आहे. तांडव सीरिज अभिनेता जीशन अयबूसह निर्मात्याला ट्विटरवर बरचं ट्रोल केले जात असून निर्मात्याने माफी मागावी अशी मागणी हिंदू संघटना करत आहेत. बॉलिवूड चित्रपटसृष्टीतील लोकं जाणूनबुजून हिंदू देवता हिंदू संस्कृतीला लक्ष करतात असे युझर्सचे मत आहे. या वेबसीरीजवर हिंदू देवतांचा अपमान केल्याचा ठपका ठेवत उच्च न्यायालयाचे वकील आशुतोष दुबे यांनी ॲमेझॉन प्राईम व्हिडिओ आणि अली अब्बास जफर यांनी अधिकृत नोटीस पाठवली आहे.