मुक्तपीठ टीम
केंद्रीय मंत्री आणि अमेठीच्या खासदार स्मृती इराणी या एकेकाळी नामांकीत क्यूंकी सास भी कभी बहू थी या मालिकेत काम करत होत्या. त्यात त्यांची तुलसीची भूमिका खुप गाजली. या भूमिकेमुळे आजही प्रेक्षक त्यांची आठवण काढत आहेत.या मालिकेतील सून तुलसी आता खरोखरच्या आयुष्यात सासू होणार आहेत. स्मृती इराणी यांनी आपल्या इंस्टाग्रामवर आपल्या भावी जावयाचा फोटो शेअर करत एक मजेदार इशाराही दिला आहे.
केंद्रीय मंत्री आणि अमेठीच्या खासदार स्मृती इराणी सोशल मीडियावर खूप सक्रिय असतात. यावेळी स्मृती यांनी चाहत्यांसाठी एक आनंदाची बातमी शेअर केली आहे. स्मृती इराणींनी त्यांच्या इंस्टाग्रामवर दोन फोटो पोस्ट केले आहेत. फोटोंमध्ये त्यांची मुलगी शैनेल इराणी तिचा बॉयफ्रेंड अर्जुन भल्लासोबत दिसत आहे. पहिल्या फोटोमध्ये अर्जुनने शैनेलला गुडघ्यावर बसून एंगेजमेंट रिंग घातली आहे. दुसऱ्यामध्ये दोघेही एकत्र रोमँटिक पोज देताना दिसत आहेत. दोघेही एकत्र खूप आनंदी दिसत आहेत.
फोटो शेअर करताना स्मृती इराणी यांनी कॅप्शनमध्ये लिहिले की, अर्जुन भल्ला आमच्या वेड्या कुटुंबात तुमचे स्वागत आहे. तुम्हाला आशीर्वाद देते कारण आता सासरे म्हणून तुम्हाला एका वेड्या माणसाशी सामना करावा लागेल आणि त्याहूनही वाईट. मला सासू म्हणून सहन करावे लागेल. मी तुम्हाला अधिकृतपणे चेतावणी देत आहे. देव तुमचे कल्याण करो.
स्मृती इराणी यांनी ही पोस्ट शेअर करताच सर्वजण कमेंट करत आहेत आणि त्यांचे अभिनंदन करत आहेत आणि शुभेच्छा देत आहेत. स्मृती यांचे लग्न झुबीन इराणीशी झाले आहे आणि शैनेल त्यांची सावत्र मुलगी आहे. शैनेल ही झुबीन आणि त्यांची पहिली पत्नी मोना इराणी यांची मुलगी आहे.
Subscribe
