"आम्ही म्हणायचं ठाकरे सरकार, प्रत्यक्षात लाभ कोण घेतं...पवार सरकार!"

मुक्तपीठ टीम

राज्याच्या अर्थसंकल्पीय अधिवेशनामध्ये निधी वाटपावेळी सर्वात जास्त निधी राष्ट्रवादीच्या मंत्र्यांच्या खात्यांना त्यानंतर कॉग्रेसच्या मंत्रांच्या खात्यांना मिळाले. मात्र शिवसेनेच्या मंत्र्याच्या खात्यांना केवळ १६ टक्के निधी मिळाल्याने नेत्यांमध्ये नाराजी निर्माण झाली आहे. याच पार्श्वभूमीवर शिवसेनेचे नेते गजानन किर्तीकर यांनी राष्ट्रवादीवर नाराजी व्यक्त करत महाविकास आघाडीला घरचा आहेर दिला आहे. केवळ आम्ही म्हणायचे ठाकरे सरकार पण प्रत्यक्ष लाभ कोण घेते, पवार सरकार, अशी टीका त्यांनी केली आहे. रत्नागिरी जिल्ह्यातील दापोली तालुक्यातील शिर्दे येथे ब्राम्हणवाडी ते कोळबांद्रे रस्त्याच्या डांबरीकरण कामाच्या भूमिपूजन समारंभाला खासदार गजानन किर्तीकर यांच्या हस्ते पार पडलेय.

आम्ही म्हणायचे ठाकरे सरकार पण प्रत्यक्ष लाभ कोण घेते? पवार सरकार…

एका आमदाराला त्याच्या मतदार संघात विकास कामासाठी शासनाकडून निधी मिळविण्यासाठी मोठे प्रयत्न करावे लागतात, असं किर्तीकर म्हणाले.
विकास कामांच्या निधीमध्ये पळवापळ केली जात असून ग्रामविकास मंत्रालयाच्या २५ / १५ योजनेमधून निधी मिळविण्यासाठी मोठी स्पर्धा पाहावयास मिळते.
आम्हाला मुंबईमध्ये हा प्रश्न उद्भवत नाही, मुंबईमध्ये नागरोत्थान, नगरविकासचा निधी मिळतो, मुख्यमंत्र्यांच्या मागे लागून आम्ही निधी मिळवितो. मात्र, निधीची पळवापळवी केली जात असून आता, केवळ आम्ही म्हणायचे ठाकरे सरकार पण प्रत्यक्ष लाभ कोण घेते, पवार सरकार, अशी टीका करत किर्तीकरांनी घरचा आहेर दिला आहे.

किर्तीकर योगेश कदमांच्या पाठीशी

अंतर्गत भेदीही खूप आहेत त्यांचाही त्रास होतो, हा त्रास मुंबई शहरात एवढा होत नाही.
मात्र, इकडे जास्त आहे असे म्हणत त्यांनी तुला तो भोगायला लागते आहे असे त्यांनी योगेश कदम यांना सांगितले.
आपण तुझ्या पाठीशी आहोत असा धीरही त्यांनी आमदार योगेश कदम यांना दिला.
या कार्यक्रमात खासदार किर्तीकर यांच्या हस्ते आमदार योगेश कदम यांचा सत्कारही करण्यात आला.
माजी पर्यावरण मंत्री रामदास कदम व माहिती अधिकार कार्यकर्ते प्रसाद कर्वे यांच्यातील मोबाइलवरील कथित संभाषण उघड झाल्यावर शिवसेनेतून रामदास कदम व त्यांचे पुत्र आमदार योगेश कदम यांना कॉर्नेर करण्याचा प्रयत्न केला जात असून दापोली व मंडणगड नगरपंचायत निवडणुकीत शिवसेनेचे उमेदवार निवडीचे अधिकार आमदार योगेश कदम यांना न देता ते माजी आमदार सूर्यकांत दळवी यांना देण्यात आले होते.
योगेश कदम यांच्या गटाचे असलेले शिवसेनेचे तालुकाध्यक्ष, उपजिल्हाप्रमुख, विधासभा क्षेत्र प्रमुख यांची उचलबांगडी करून तेथे माजी आमदार सूर्यकांत दळवी यांच्या गटाच्या पदाधिकाऱ्यांची नियुक्ती पालकमंत्री अनिल परब यांनी केली होती.
त्यामुळे योगेश कदम यांना पक्षांतर्गत विरोधाला तोंड द्यावे लागत असल्याचं चित्र आहे.