“सरकारपेक्षा शेतकरी महत्वाचे!”, शिवसैनिकाची लक्षवेधी प्रतिक्रिया!!

मुक्तपीठ टीम

उत्तरप्रदेशातील लखीमपूर खेरीमध्ये गृहराज्यमंत्री मिश्रांचा मुलगा आशिष मिश्राने निदर्शक शेतकऱ्यांना गाडीखाली चिरडण्याची अमानुष घटना घडल्याच्या निषेधार्थ महाविकास आघाडीने महाराष्ट्र बंद पुकारला आहे. बंद ही विशेषता असलेल्या शिवसेनेचे शिवसैनिक बऱ्याच वर्षांनी पुकारल्या गेलेल्या बंदला यशस्वी करण्यासाठी आक्रमकरीत्या रस्त्यावर उतरले आहेत. दादर, वरळी सारख्या मध्य मुंबईतील वाहतूक केंद्रांच्या ठिकाणी शिवसेना नेत्या आणि महापौर किशोरी पेडणेकर, सचिन अहिर, शिवसेना आमदार सदा सरवणकर यांच्या नेतृत्वाखाली शिवसैनिक आक्रमक झाले. एका शिवसैनिकाला माध्यम प्रतिनिधीने विचारले असता त्यांनी दिलेली प्रतिक्रिया लक्षवेधी ठरली, तो शिवसैनिक म्हणाला, “सरकारपेक्षा शेतकरी महत्वाचे…शेतकरीच महत्वाचे, नाही का?”

बंद मोडून काढू अशी भाषा करणारे मूर्ख! – संजय राऊत

• राज्यातील बंद शंभर टक्के यशस्वी झाला आहे. शेतकऱ्यांचं आपण देणं लागतो, त्यामुळेच हा बंद आहे.
• पण बंदला पाठिंबा नाही, बंद मोडून काढू अशी भाषा करणारे मूर्ख आहेत, अशी टीका करतानाच बंद मोडून काढण्याचा इशारा देणाऱ्यांनी रस्त्यावर उतरून दाखवावंच असा इशारा शिवसेना नेते संजय राऊत यांनी दिला आहे.

थारवाल्यांनी रस्त्यावर येऊन दाखवा!

• कोणी हा बंद मोडून काढू असं म्हणत असेल तर ते मूर्ख आहेत.
• कोणाला वाटत असेल तर आम्ही रस्त्यावर उतरू तर त्यांनी येऊन दाखवावं.
• लखीमपूर खेरीत मंत्रीपुत्राने त्याच्या थार गाडीच्या माध्यमातून शेतकऱ्यांना चिरडण्याचा प्रयत्न केला अशी कुणाकडे एखादी जीपगाडी असेल तर त्यांनी रस्त्यावर आणावीच!
• आमचा बंदला पाठिंबा नाही अशी कोणी राजकीय विधान करत असेल तर त्यांनी आपण या देशाचे नागरिक आहोत का? या देशातील शेतकऱ्यांचे देण लागतो का? हा प्रश्न स्वत:ला विचारावा.

शेतकऱ्यांसाठी बंद आहे!

• विरोधाचे कीडे वळवळत असतात.
• हा राजकीय बंद नाही. शेतकऱ्यांसाठी बंद आहे.
• शेतकऱ्यांनी अन्न पिकवलं नाही तर हे गाड्या रस्त्यावर काढा म्हणतात ते उपाशी मरतील.
• त्यामुळे शेतकऱ्यांसाठी आपण एक दिवस बंद पुकारणार नसू तर जय जवान जय किसान!