मुक्तपीठ टीम
“कोकण हा शिवसेनेचा बालेकिल्ला आहे, असे म्हटले जाते. कोकणात शिवसेनेशिवाय कुणी दुसरं जिंकत नाही. पण या ग्रामपंचायत निवडणुकीत कोकण हा शिवसेनेचा बालेकिल्ला हा समज कोकणी मतदारांनी खोटा ठरवला. भाजपाला भरभरून मतदान दिलं. तसेच राज्यात भाजपच नंबर १ पक्ष आहे” असा दावा भाजपा प्रवक्ते केशव उपाध्ये यांनी ग्रामपंचायत निवडणुकीचे निकाल सुरु असताना केला आहे.
केशव उपाध्येंच्या दाव्यानुसार, “सिंधुदुर्गमध्ये ७० पैकी ५५ च्या आसपास ग्रामपंचायती भाजपाने जिंकल्या आहेत. देवगडमध्ये २३ पैकी १७ भाजपाने जिंकल्या आहेत. वैभववाडीत १२ पैकी ९ ग्रामपंचायती जिंकल्या आहेत. स्थानिक शिवसेना खासदार विनायक राऊत यांनी तळेगाव ग्रामपंचायत दत्तक घेतली होती, ही ग्रामपंचायत देखील भाजपाने जिंकली आहे. मालवणमधील सहा पैकी पाच ग्रामपंचायती भाजपाने जिंकल्या आहेत. कुडाळमधील पाच पैकी चार ग्रामपंचायती जिंकल्या आहेत.”
“पश्चिम महाराष्ट्र म्हणजे काँग्रेस-राष्ट्रवादीचा बालेकिल्ला अशाप्रकारचा समज गेली अनेक वर्षांपासून आहे. परंतु मागील अनेक वर्षांपासून पश्चिम महाराष्ट्र प्रत्येक निवडणुकीत भाजपाच्या पाठिशी आहे. ग्रामपंचायत निवडणुकीत देखील भाजपाला पश्चिम महाराष्ट्रात घवघवीत यश मिळालं.” असल्याचेही यावेळी केशव उपाध्ये यांनी सांगितले.
राज्यभरातील ग्रामपंचायत निवडणुकीचे निकाल समोर येऊ लागले आहेत. राज्यातील चार प्रमुख पक्षांमध्ये चुरस असल्याचे दिसत आहे. त्यात माध्यमांमधील बातम्यांमध्ये शिवसेना क्रमांक १चा पक्ष झाल्याचे दिसत आहे. या पार्श्वभूमीवर अधिक माहिती देण्यासाठी भाजपाकडून पत्रकारपरिषदेचे आयोजन करण्यात आले होते.
Subscribe
