थरूर निवडणुकीत पराभूत, पण पवार, पायलटांपेक्षा मिळवली जास्त मतं!

मुक्तपीठ टीम

काँग्रेस अध्यक्षपदाच्या निवडणुकीत शशी थरुर यांचा पराभव झाला आहे. मल्लिकार्जुन खरगे यांच्या विजयाने काँग्रेस पक्षाला २४ वर्षांनंतर बिगर गांधी घराण्यातील अध्यक्ष मिळाला आहे. खरगे यांना ७ हजार ८९७ मते मिळाली. तर शशी थरूर यांना १०७२ मतंच मिळवता आली. शशी थरूर यांचा पराभव झाला असला, तरी त्यांना मिळालेली मतं ही २००० आणि १९९७ मध्ये झालेल्या पक्षाच्या सर्वोच्च पदाच्या दोन मागील निवडणुकांमध्ये पराभूत झालेल्या शरद पवार, राजेश पायलट या दिग्गज उमेदवारांपेक्षा जास्त आहेत.

कधी कोणाला किती मते मिळाली?

• थरूर यांना एकूण वैध मतांपैकी १२ टक्के मते म्हणजे १०७२ मते मिळाली.
• यापूर्वी २००० मध्ये काँग्रेस अध्यक्षपदाच्या निवडणुकीत जितेंद्र प्रसाद आणि सोनिया गांधी यांच्या विरोधात सामना झाला होता.
• त्या निवडणुकीत सोनियांना ७ हजार ४४८ मते मिळाली, तर प्रसाद यांना केवळ ९४ मतांनी दारूण पराभवाला सामोरे जावे लागले.
• यापूर्वी १९९७ मध्ये सीताराम केसरी यांनी शरद पवार आणि राजेश पायलट यांच्यात लढतीत विजय मिळवला होता.
• केसरी यांना ६ हजार २२४ मते मिळाली, तर पवार यांना ८८२ आणि पायलट यांना केवळ ३५४ मते मिळाली.

पराभवावर थरूर काय म्हणाले?

• शशी थरूर यांनी खरगे यांचे अभिनंदन करताना ट्विट केले की, हजारांहून अधिक मित्रपक्षांचा पाठिंबा मिळणे हा सन्मान आहे.
• मी कधीही मतभेदाचा उमेदवार नव्हतो, तर परिवर्तनाचा उमेदवार होतो.
• पक्षाचे नवनिर्वाचित अध्यक्ष मल्लिकार्जुन खरगे हे काँग्रेस कार्यकारिणीच्या (सीडब्ल्यूसी) निवडणुकीसाठी दिलेल्या काँग्रेस घटनेतील तरतुदींचे पालन करतील, अशी आशाही त्यांनी व्यक्त केली.