शिवसेनेनं भाजपाला करून दिली बोट धरून मोठं झाल्याची आठवण!

मुक्तपीठ टीम

भाजपाचे प्रदेशाध्यक्ष चंद्रकांत पाटलांनी मुख्यमंत्री उद्धव ठाकरे यांच्यावर केलेल्या टीकेवर शिवसेना नेते, गृहराज्यमंत्री शंभुराज देसाई यांनी चांगलच प्रत्युत्तर दिलं आहे. चंद्रकांत पाटलांच्या नैराश्यापोटी वल्गना सुरु आहेत. आपण सेनेचं बोट धरुन मोठे झालात हे विसरु नका, असा इशारा शंभुराज देसाईंनी चंद्रकांत पाटलांना दिला आहे.

काय म्हणाले शंभुराज देसाई?

• उद्धव ठाकरे यांच्यावर केलेल्या या आरोपांना कोणताही आधार नाही.
• तसंच चंद्रकांत पाटील हे सगळं त्यांना आलेल्या नैराश्यातून बोलुन वेगवेगळ्या वल्गना करतायेत.
• तुमचे महाराष्ट्रात निवडून आलेले खासदार सुद्धा आमच्या जीवावरच निवडून आलेत त्यामुळं आमच्यावर असे आरोप करु नका.
• महाराष्ट्रात बाळासाहेब ठाकरेंचं बोट धरुनच भारतीय जनता पक्ष पुढं आलाय हे विसरु नका.
• बाळासाहेब ठाकरेंचं बोट धरुनच ग्रामीण भागात तुमचा पक्ष वाढलाय हे माहती करुन घ्यायचं असेल तर अडवाणींना विचारा असा सल्ला सुद्धा त्यांनी चंद्रकांत पाटील यांना दिलाय.

देसाईंचा पाटलांना इशारा

• भाजपाची आताची सूत्र ज्यांच्या हातात आहेत त्यांना या सगळ्या गोष्टींचं विस्मरण झालंय का?
• आमच्या १८ खासदारांवर तुम्ही बोलू नका निवडणुकीत युती असल्यामुळं प्रत्येकानं प्रत्येकाला या ठिकाणी मदत केल्यामुळंच दोघांचे खासदार निवडुन आले आहेत.
• शिवसेनेच्या जीवावर सुद्धा भाजपाचे खासदार निवडून आलेत हे विसरु नका. आता पुढच्या निवडणुकीत शिवसेना भाजपाला जागा दाखवून देईल.

काय म्हणाले होते चंद्रकांत पाटील?

• चंद्रकांत पाटील हे सातारा जिल्ह्यातील फलटणच्या दौऱ्यावर होते.
• फलटण येथील भाजपच्या कार्यक्रमात चंद्रकांत पाटील यांनी मुख्यमंत्री उद्धव ठाकरे यांच्यावर टीका केली.
• ज्यांनी आमच्या जीवावर अठरा खासदार निवडून आणलेत ते आता देशाच्या राजकारणात जायची स्वप्न बघत आहेत.
• देशाच्या राजकारणात जायचं असेल तर त्यासाठी घराच्या बाहेर पडावं लागतं.
• गेल्या दोन वर्षात एकदाही मंत्रालयात न गेलेल्यांनी वेगवेगळ्या वल्गना करु नयेत.