कोल्हापुरात १६ जूनला पहिला मराठा आरक्षण मोर्चा!

मुक्तपीठ टीम

खासदार संभाजी छत्रपती यांनी अखेर जाहीर केल्याप्रमाणे रायगडावरून मराठा आरक्षणासाठी आंदोलनाची घोषणा केली आहे. मराठा आरक्षणासाठीचा पहिला मोर्चा १६ जून रोजी काढण्यात येणार आहे. कोल्हापुरातील छत्रपती शाहू महाराजांच्या समाधीस्थळावरून हा मोर्चा काढण्यात येणार आहे.

छत्रपती शिवाजी महाराजांच्या ३४८व्या शिवराज्याभिषेक सोहळ्याच्या निमित्ताने याहीवर्षी रायगडावर भव्य सोहळा संपन्न झाला. छत्रपती संभाजी छत्रपती यांनी या सोहळ्यानंतर आंदोलनाची घोषणा केली.

मराठा आरक्षणासाठी छत्रपतींचा एल्गार

छत्रपती शाहू महाराजांनी आरक्षण दिले, त्या शाहू महाराजांच्या कोल्हापूरमधील समाधी स्थळावरूनच आम्ही आंदोलन करणार आहोत.
सोळा जून रोजी हा मोर्चा काढण्यात येईल.
आधीचे सरकार आणि आजचे सरकार मराठा आरक्षणावर एकमेकांकडे बोट दाखवत आहेत.
तुम्ही खेळ सुरू केला आहे का? खेळ करू नका.
मी संयमी आहे. त्याचा मला अभिमान आहे.
तुम्ही माझा संयम पाहिला. आता संयमी राहणार नाही. आता काय होईल ते होईल.
मी मेलो तरी चालेल पण मराठा समाजाला न्याय दिल्याशिवाय राहणार नाही.

मी समाजाला वेठीस धरणार नाही…

लोकं नाराज झाले तरी चालतील. पण मी समाजाला वेठीस धरणार नाही.
दिशाभूल करणं आमच्या रक्तात नाही.
शिवभक्तांचा मला पाठिंबा आहे.
काही शिवभक्त माझ्यावर नाराज आहेत.
पण कोरोनाचं संकट असल्याने काहीच करता येत नाही. माझं काही चुकलं असेल तर मी दिलगिर आहे.
आपण जगलो तर महाराजांचे विचार पुढे घेऊन जाऊया.

सर्वांना आरक्षण आहे, मराठ्यांनाच नाही!

मी राजकारणी नाही, पण आवाज उठवणार
मी राजकारणी नाही. राजकारण करत नाही.
समाजावर अन्याय होत असेल तर न्याय देणं ही आमची भूमिका आहे.
मराठा समाज वाईट परिस्थितीत आहे.
त्यांच्यासाठी आवाज उठवायचा नाही का?
सर्वांना आरक्षण आहे, मराठ्यांना नाही.
मग मी आवाज उठवायचा नाही का? मराठा समाजावर अन्याय होत असेल तर सहन करणार नाही, असा इशाराही त्यांनी दिला.

मी सांगितले, तेच भोसले समितीनेही सांगितले!

सर्वोच्च न्यायालयाच्या निर्णयाचा अभ्यास करण्यासाठी भोसले समिती स्थापन करण्यात आली.
या समितीने अहवाल दिला आहे.
काही शिफारशी केल्या आहेत.
मुख्यमंत्र्यांना भेटल्यानंतर पत्रकार परिषद घेऊन मी ज्या गोष्टी सांगितल्या त्याच भोसले समितीने सांगितल्या आहेत.
समितीने काही वेगळं सांगितलं नाही. मी सांगितलेल्या पाच मागण्यांवर तात्काळ कार्यवाही करा.
समाजाला वेठीस धरू नका.