“साकीनाक्याच्या नराधमाला फाशीची शिक्षा द्या”!

मुक्तपीठ टीम

साकीनाका येथील महिलेवर अत्याचार करून तिची निर्घृण हत्या करण्यात आल्याचा प्रकार मानवतेला कलंक फासणारा आहे. या प्रकरणी दोषी आरोपींना कठोरात कठोर फाशीची शिक्षा द्यावी अशी मागणी रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी केली आहे.

अत्याचार आणि अमानुष मारहाण झालेल्या महिलेला राजावाडी रुग्णालयात दाखल केल्यानंतर शनिवारी दुःखद निधन झाल्याचे कळताच रामदास आठवले यांनी राजावाडी रुग्णालयात भेट देऊन वैद्यकीय अधिष्ठाता डॉ विद्या ठाकूर यांची भेट घेतली. तोपर्यंत पीडित महिलेचा पार्थिव देह जे जे रुग्णालय येथे शवविच्छेदन तपासणी साठी पाठविण्यात आला होता.

त्यानंतर माध्यमांशी बोलताना रामदास आठवले यांनी याप्रकरणी जलद गती न्यायालयात खटला चालवून सहा महिन्यात आरोपीना फाशीची शिक्षा करण्याची मागणी केली. यावेळी रिपाइंचे मुंबई अध्यक्ष गौतम सोनवणे; डी एम चव्हाण आदी रिपाइं पदाधिकारी उपस्थित होते.

सदर पिडीत महिला जर दलित समाजाची असेल तर या प्रकरणी ऍट्रोसिटी ऍक्ट सुद्धा लावण्यात यावा. पिडित महिला कोणत्याही समाजाची असो ती महिला आहे तिला न्याय मिळाला पाहिजे, अशी मागणीही करण्यात आल्याचे उत्तर महाराष्ट्र प्रदेश सोशल मिडिया आयटी सेलचे अध्यक्ष महेंद्र सोनवणे यांनी कळवले आहे.