कला, संस्कृतीचे रंग आणि पाहुणचाराचे बदलते ढंग, रंगलं डहाणू फेस्टिव्हलचं पहिलं पर्व!

मुक्तपीठ टीम

पालघर जिल्ह्याला अथांग समुद्र किनारा लाभलेला आहे. त्यामुळे या जिल्ह्यात पर्यटनाला मोठा वाव असून पर्यटनाला महत्त्व प्राप्त व्हावा म्हणून डहाणूमध्ये डहाणू नगर परिषदेच्या माध्यमातून डहाणू महोत्सवाचे आयोजन करण्यात आले होते. डहाणू नगरपरिषद आयोजित डहाणू फेस्टिव्हल हा दोन दिवसांचा होता. पारनाक येथील समुद्र किनाऱ्यावर हा फेस्टिव्हल भरविण्यात आला होता. या महोत्सवात पर्यटनाबरोबरच पालघर जिल्ह्यातील हस्तकला, लोककला, त्याचप्रमाणे उत्पादित वस्तूंना बाजारपेठ उपलब्ध करून दिली. या महोत्सवाला हजारो पर्यटकांनी तसेच काही दिग्गजांनीही उपस्थिती लावली होती.

पर्यटकांनी या फेस्टिव्हलचा आनंद लुटला आहे. पर्यटकांना आकर्षित करण्यासाठी समुद्र किनाऱ्यावर सुंदर अशी वाळूशिल्प व सेल्फी पॉईंट उभारण्यात आले होते. तर समुद्रात बोटिंगचीही व्यवस्था करण्यात आली होती. या फेस्टिव्हलमध्ये पालघर जिल्ह्यातील कला संस्कृतीचे दर्शन घडविण्यात आले असून वेगवेगळ्या हॅन्डमेड वस्तूंच्या दुकानांबरोबर खाद्य संस्कृतीचे दुकानंही उभारण्यात आली होती. सध्या परीक्षा सुरू असूनही सुट्टीच्या दिवशी या महोत्सवाचे आयोजन असल्याने पर्यटकांनी आवर्जून हजेरी लावली.

या फेस्टिवलला आज शिवसेनेचे खासदार राजेंद्र गावित भाजपच्या दहिसरच्या आमदार मनीषा चौधरी शिवसेनेचे पालघरचे आमदार श्रीनिवास वनगा माकपाचे डहाणू आमदार विनोद निकोले यांनी हजेरी लावली. कोरोना काळानंतर पालघर जिल्हा ब श्रेणीत असला तरी हा महोत्सव भरवला गेला आहे याबद्दल समाधान व्यक्त करत डहाणूची प्रसिद्ध महालक्ष्मी यात्रा ही संपन्न होईल त्यासाठी प्रयत्न करणार असल्याचे मत उपस्थित आमदार खासदारांनी व्यक्त केले.

पाहा व्हिडीओ: