जिल्हा बँकेसाठी सर्वपक्षीयांची दिलजमाई…एक-दोन जागांचा तिढा सुटला तर सत्ता वाटपाचा जळगाव पॅटर्न!

मुक्तपीठ टीम

जळगाव जिल्हा मध्यवर्ती सहकारी बँकेच्या निवडणुकीसाठी सर्व पक्ष सक्रिय झाले आहेत. ही निवडणूक बिनविरोधक होणार असल्याचेही चिन्ह आहे. मात्र असं असताना सोमवारी झालेल्या सर्वपक्षीय नेत्यांच्या कोअर कमिटी बैठकीत २१ पैकी एक-दोन जागांबाबत एकमत झालेले नाही. यासाठीच पुन्हा एकदा जागा वाटपाच्या अंतिम निर्णयासाठी बैठक होणार आहे. या बैठकीत सर्वपक्षीय पॅनलचा प्रश्न सुटेल अशी आशा व्यक्त केली जात आहे.

बैठकीला कोणाकोण होते उपस्थित?

• जिल्हा बँकेच्या निवडणुकीच्या अनुषंगाने सोमवारी रात्री आठ वाजता अजिंठा शासकीय विश्रामगृहात सर्वपक्षीय नेत्यांची बैठक पार पडली.
• शिवसेनेकडून पालकमंत्री गुलाबराव पाटील, आमदार किशोर पाटील, माजी आमदार प्रा. चंद्रकांत सोनवणे
• राष्ट्रवादी काँग्रेसकडून माजी मंत्री एकनाथ खडसे, गुलाबराव देवकर
• भाजपकडून माजी मंत्री गिरीश महाजन, आमदार सुरेश भोळे
• काँग्रेसच्या वतीने आमदार शिरीष चौधरी आणि जिल्हाध्यक्ष अॅड. संदीप पाटील आदींची उपस्थिती होती.
• निवडणुकीसाठी जागा वाटपाच्या मुद्द्यावर सुमारे तासभर सर्वपक्षीय नेत्यांमध्ये चर्चा झाली.
• पण अखेर एक-दोन जागांबाबत निर्णय होऊच शकला नाही.

अध्यक्ष पदाचा फॉर्म्युला

• या बैठकीत बँकेच्या अध्यक्ष पदाचा फॉर्म्युला मात्र, सर्वानुमते ठरला.
• शिवसेना, राष्ट्रवादी, भाजप आणि काँग्रेस अशा चारही पक्षांनी ५ वर्षांपैकी प्रत्येकी सव्वा-सव्वा वर्षे अध्यक्ष पद भूषवावे, असा निर्णय नेत्यांमध्ये झाला आहे.
• मात्र, सुरुवातीला नेमक्या कोणत्या पक्षाचा अध्यक्ष असेल, हे अद्याप ठरलेले नाही.
• निवडणुकीनंतर ऐनवेळी त्याबाबत निर्णय होईल, असे सांगितले जात आहे.