महाराष्ट्राच्या विधानसभेत पहिल्याच दिवशी गाजले ते पंतप्रधान मोदी!

मुक्तपीठ टीम

महाराष्ट्र विधिमंडळाच्या हिवाळी अधिवेशनाच्या पहिल्याच दिवशी विधानसभेत पंतप्रधान नरेंद्र मोदी गाजले. त्याचे कारण होते, सत्ताधारी आघाडीतील कॅबिनेट मंत्री नितीन राऊत यांनी केलेला त्यांचा उल्लेख, त्याला विरोधी पक्षनेते देवेंद्र फडणवीस यांनी घेतलेला आक्षेप. आणि यासर्वांवर कडी चढवणारी आमदार भास्कर जाधवांची उक्ती आणि कृती. त्यामुळे फडणवीस यांनी संतापत जोरदार आक्षेप घेतला. त्यामुळे सभागृहाचे कामकाजही स्थगित करावं लागलं.

काय म्हणाले भास्कर जाधव?

विधानसभेत नितीन राऊत यांनी एका विषयासंबंधी बोलताना पंतप्रधान नरेंद्र मोदी यांनी काळा पैसा बाहेर काढू, नागरिकांना १५-१५ लाख रुपये देऊ असं आश्वासन दिल्याचे वक्तव्य केलं.
मात्र विरोधी पक्षनेते देवेंद्र फडणवीस यांनी या विधानाला आक्षेप घेतला.
पंतप्रधान नरेंद्र मोदी यांनी असं आश्वासन कधीही दिलच नव्हतं, असा दावा फडणवीस यांनी केला.
या लक्षवेधीशी पंतप्रधानांचा संबंध नसतानाही तो विषय काढणं हे आम्ही सहन करणार नाहीत.
त्यानंतर आमदार भास्कर जाधव उभे राहिले आणि म्हणाले, २०१४ साली देशाचे पंतप्रधान होण्यापूर्वी नरेंद्र मोदी म्हणले, ‘काला धन लाने का है की नही लाने का… लाने का… लाने का है तो कहाँ रखने का.. यु ही रखने का.. ‘. अशा प्रकारे नक्कल केली.

देवेंद्र फडणवीस आक्रमक

सभागृहात भास्कर जाधव यांना निलंबित करा, अशा घोषणा सुरु झाल्या.
देवेंद्र फडणवीस म्हणाले, ‘सभागृहात देशाच्या पंतप्रधानांची नक्कल सहन केली जाणार नाही. ‘ अंगविक्षेप करतायत ते सहन केलं जाणार आहे का, ही पद्धत आहे का सभागृहाची?
अंगविक्षेप करून भास्कर जाधव जे बोलतायत हे शोभनीय नाही.
हे चालत नाही.
आम्ही यांच्या नेत्यांचीही अशाच प्रकारे नक्कल केली, तर हे चालेल का सभागृहाला?
त्यांनी माफी मागितली पाहिजे, अध्यक्ष महोदय.”

भास्कर जाधवांनी माफी मागितली

विरोधी पक्षनेते देवेंद्र फडणवीस यांनी सभागृह स्थगित करण्याची मागणी केली.
त्यानंतर भास्कर जाधव यांनी उभे राहून, या सर्व प्रकरणावर माफी मागितली.
ते म्हणाले, मी बोलण्याच्या ओघात माननीय पंतप्रधानांची नक्कल केली असेल, पण असंसदीय शब्द वापरलेले नाही, पंतप्रधान होण्यापूर्वी ते जे बोललेले तेच शब्द मी वापरले, पण तरीही सभागृहाचे कामकाज चालण्यासाठी मी माफी मागतो.
पंतप्रधानांबद्दल केलेले वक्तव्य मी मागे घेतो, तसेच माझे अंगविक्षेपही मागे घेतो, असे ते म्हणाले.
विप नेते देवेंद्र फडणवीस यांनी हक्कभंग आणणार म्हटले आहे, त्यांनी तो नक्की आणावा. याच अर्थ मी बरोबर होतो. मी हक्कभंगाला सामोरे जाण्यास तयार आहे.