मुक्तपीठ टीम
सिडको महामंडळाकडून मराठी भाषा भवन उपकेंद्राच्या उभारणीकरिता ऐरोलीतील एक भूखंड देण्यात आला आहे. मंगळवारी या भूखंडाचे महाराष्ट्र शासनाच्या मराठी भाषा विभागाला हस्तांतरण करण्यात आले. त्यावेळी मराठी भाषा विभागाचे मंत्री सुभाष देसाई, सिडकोचे उपाध्यक्ष तथा व्यवस्थापकीय संचालक डॉ. संजय मुखर्जी, सहसचिव मिलिंद गवादे, एस. एस. पाटील, अनिल पवार, बी. डी. राठोड, जनसंपर्क अधिकारी प्रिया रातांबे उपस्थित होते.
“मराठी भाषा भवन उपकेंद्राची इमारत ही बहुउद्देशीय सामाईक सुविधांनी युक्त असणार आहे. या इमारतीत ग्रंथालय, बैठकांसाठी बहुउद्देशीय सभागृह यांसह भाषाविषयक विविध उपक्रमांची कार्यालये व अध्यक्षांसाठी स्वतंत्र दालनांची व्यवस्था असणार आहे”, अशी माहिती सुभाष देसाई, मंत्री, मराठी भाषा विभाग यांनी याप्रसंगी दिली.
मराठी भाषा विकास व संवर्धनाकरिता कार्यरत असणाऱ्या भाषा संचलनालय, महाराष्ट्र राज्य साहित्य आणि संस्कृती मंडळ, महाराष्ट्र राज्य मराठी विश्वकोश निर्मिती मंडळ आणि राज्य मराठी विकास संस्था, या संस्थांची कार्यालये मुंबईमध्ये वेगवेगळ्या ठिकाणी आहेत. यामुळे ही सर्व कार्यालये एकाच ठिकाणी आणून त्यामध्ये एकसूत्रता निर्माण करण्याच्या उद्देशाने राज्य शासनाने २०१६ मध्ये सिडकोकडे भूखंडाबाबत विचारणा केली होती. त्यानुसार, सिडकोकडून ऐरोली येथील सेक्टर-१३ मधील भूखंड क्र. ६अ हा अंदाजे ३०००चौ.मी. चा भूखंड मराठी भाषा भवन उपकेंद्राकरिता निश्चित करण्यात येऊन, दीर्घ मुदतीच्या भाडेपट्ट्याने या भूखंडाचा ताबा राज्य शासनाला देण्यात आला.
त्याचप्रमाणे इमारतीची उभारणी करण्याची जबाबदारी शासनातर्फे महाराष्ट्र औद्योगिक विकास महामंडळास देण्यात आली आहे अशी माहिती सुभाष देसाई, मंत्री, मराठी भाषा विभाग यांनी दिली.
Subscribe
