मुक्तपीठ टीम
कर्नाळा बँकेवर घोटाळ्यानंतर सहकार खात्याने नियुक्त केलेले आवसायनक जी. जी. मावळे यांची पनवेल संघर्ष समितीच्या शिष्टमंडळाने अध्यक्ष कांतीलाल कडू यांच्या नेतृत्वाखाली भेट घेवून पुढील रणनीतीविषयी सविस्तरपणे चर्चा केली.
कांतीलाल कडू यांच्या समवेत ठेवीदारांचे प्रतिनिधी अशोक मुणोथ, गणेश बडगुजर, रत्ना बडगुजर आणि शैलेजा मुरबाडकर आदींचा समावेश होता.
बँकेचा व्यावसायिक परवाना रद्द झाल्यानंतर सर्व ठेवीदारांचे पैसे त्यांना परत मिळावेत याकरिता पुढील व्यवस्थेबाबत शिष्टमंडळाने मावळे यांच्याशी सखोल चर्चा केली. रिझर्व्ह बँक, विमा महामंडळ यांच्या नियमांनुसार ठेवीदारांची संपूर्ण माहिती दर्शविणारे केवायसी फार्म भरून ते लवकरच बँकेत दाखल करण्याची प्रक्रिया सुरू करण्यास मावळे यांनी अनुकूलता दर्शविली. त्याशिवाय ठेवीदारांना त्यांच्या हक्काचे सेव्हिंग, करंट खात्यासह मुदत ठेवींपोटी असलेल्या पाच लाख रुपयांपर्यंत विमा मिळणार आहे. त्यात मुद्दल आणि व्याजाचा समावेश असणार आहे.
पहिल्या आठवड्यात बँक कर्मचारी संपूर्ण डेटा अपडेट करणार असून त्यानंतर डिपॉझिट इन्शुरन्स कंपनीला एक प्रस्ताव पाठविण्यात येईल.
मावळे यांच्या प्रस्तावाची छाननी करून त्याचे ऑडिट केले जाईल आणि मग विम्याच्या रकमेचे वितरण होईल, या सर्व प्रक्रियेत सर्व ठेवीदारांना पनवेल संघर्ष समिती हवे ते सहकार्य करण्यास मदत केंद्र सुरू करणार आहे.
याशिवाय लवकरच ७६ आरोपींना अटक आणि त्यांच्या मालमत्तेसह सहकार खात्याने दोषी ठरवलेल्या वीस संचालकांच्या मालमत्तेचा निर्णय घेण्यासाठी पनवेल संघर्ष समितीने पाऊल उचलले असल्याची माहिती कांतीlलाल कडू यांनी दिली आहे.
Subscribe
