ऊर्जामंत्री नितीन राऊतांकडून डॉ. बाबासाहेब आंबेडकरांवरील कवितांचे अभिवाचन

मुक्तपीठ टीम

राज्याचे ऊर्जामंत्री आणि राष्ट्रीय काँग्रेसच्या अनुसूचित जाती विभागाचे अध्यक्ष डॉ. नितीन राऊत यांनी मराठी भाषा दिनानिमित्त समस्त मराठी जनतेला अभिनव पध्दतीने शुभेच्छा दिल्या आहेत. भारतीय संविधानाचे शिल्पकार आणि महामानव डॉ. बाबासाहेब आंबेडकर यांच्यावरील दोन कवितांचे अभिवाचन केलेला एक व्हिडिओ डॉ. राऊत यांनी या निमित्त प्रसारित केला आहे.

मराठी भाषा समृद्ध करण्यात डॉ. आंबडेकरांच्या प्रेरणेने सुरू झालेली दलित चळवळ आणि दलित साहित्य यांनी मोठे योगदान दिले आहे. हे योगदान अधोरेखित करण्याचा एक प्रयत्न म्हणून महाकवी नामदेव ढसाळ आणि वामनदादा कर्डक यांच्या कवितांचे अभिवाचन डॉ. राऊत यांनी केले आहे.

“माझ्या जीवनावर आणि राजकीय व सामाजिक संघर्षावर सर्वाधिक प्रभाव आहे तो म्हणजे महामानव डॉ. बाबासाहेब आंबेडकर यांचा. प्रत्येक आंबेडकरी व्यक्तीचा प्राण हे डॉ. आंबेडकर आहेत. त्यांच्याबद्दलची आमची कृतज्ञतेची भावना महाकवी नामदेव ढसाळ आणि वामनदादा कर्डक यांनी त्यांच्या कवितांमधून व्यक्त केली आहे. त्या कवितांचे वाचन करणार आहे,” असे म्हणत त्यांनी दोन कवितांचे अभिवाचन केले आहे.

नामदेव ढसाळ यांची ही कविता त्यांनी वाचून दाखवली आहे.

“आज आमचे जे काही आहे..

ते सर्व तुझेच आहे

हे जगणे आणि हे मरणे

हे शब्द आणि ही जीभ

हे सुख आणि दुःख

हे स्वप्न आणि हे वास्तव

ही भूक आणि तहान

ही सर्व पुण्याई तुझीच आहे”

वामनदादा कर्डक यांच्या पुढील कवितेचेही अभिवाचन त्यांनी केले आहे.

“भाजीत भीम आहे

रोटीत भीम आहे

आहे उपास पोटी

कोटीत भीम आहे

भीमा नदीचे पाणी

नेले अशा ठिकाणी

त्या गावच्या नळाच्या

तोटीत भीम आहे!”

डॉ. बाबासाहेब आंबेडकर यांनी विचारवंत, समाजसुधारक, संपादक आणि घटनातज्ञ या भूमिकेतून केलेल्या विविधांगी लेखनाने आणि दलित साहित्याने मराठी भाषेला नवी समृद्धी मिळवून दिली. त्यामुळेच डॉ.आंबेडकरांवरील कवितांचे अभिवाचन करून मी #मराठीराजभाषादिन निमित्त शुभेच्छा दिल्या.@INCMaharashtra pic.twitter.com/IvGJv2Gfwm

— Dr. Nitin Raut (@NitinRaut_INC) February 27, 2021