मुक्तपीठ टीम
राष्ट्रवादी काँग्रेसचे नेते आणि सामाजिक न्यायमंत्री धनयंज मुंडे यांच्यावर एका महिलेने बलात्कार केल्याचा गंभीर आरोप केला आहे. या आरोपानंतर संपूर्ण राजकीय वर्तृळात गदारोळ माजला. या प्रकरणी मुंडे यांनी हे सर्व आरोप खोटे असून मला ब्लॅकमेल करण्याचा प्रयत्न केला जात असल्याचं म्हटले आहे. या प्रकरणानंतर राष्ट्रवादी पक्ष काय भूमिका घेणार याकडे लक्ष होते. मंगळवारी उशिरा रात्री राष्ट्रवादीचे प्रवक्ते नवाब मलिक यांनी याप्रकरणी भाष्य केले आहे.
‘एखादी तक्रार झाली तर त्याची चौकशी होत असते. पण आरोप करणारी महिला त्यांची नातेवाईक आहे. तक्रारदाराच्या बहिणीशी धनंजय मुंडे यांनी लग्न केलेले असून, उभयतांना दोन मुलेसुद्धा आहेत. याच्यामागे काय कारण आहे ते चौकशीत सगळे समोर येईल. त्यांची जी बाजू आहे ती निश्चित प्रकारे ते मांडतील. चौकशीनंतरच काय ते समोर येईल. त्यावर फार काही बोलू शकणार नाही,’ असेही नवाब मलिक यांनी प्रतिक्रिया दिली आहे.
काय आहे प्रकरण?
मुंबईतील ओशिवरा पोलीस ठाण्यात एका महिलेनं धनंजय मुंडे यांच्याविरोधात तक्रार अर्ज दिला होता. या प्रकरणानंतर धनंजय मुंडेंनी खुलासा केला आहे. कालपासून समाज माध्यमांमधून माझ्याविषयी काही कागदपत्र प्रसारित होत असल्याचे तसेच मीडिया व सोशल मिडियाद्वारे माझ्यावर बलात्काराचे आरोप करण्यात येत आहेत. सदर प्रकरणी एका महिलेने स्वतः त्यांच्या खात्यावरून ट्विट केले आहे. मात्र, हे सर्व आरोप खोटे असून माझी बदनामी करणारे आणि मला ब्लॅंकमेल करणारे आहेत, असं खुलासा मुंडे यांनी केला आहे.
तसेच एका महिलेसोबत मी २००३ पासून परस्पर सहमतीने संबंधांत होतो. ही बाब माझे कुटुंबीय, पत्नी व मित्र परिवार यांना अवगत होती. सदर परस्पर सहमतीच्या संबंधामधून आम्हाला एक मुलगा व एक मुलगी अशी दोन मुले झाली, असे मुंडे यांनी स्पष्ट केले आहे.
Subscribe
