मुक्तपीठ टीम
मनी लाँड्रिंग प्रकरणात गजाआड आसलेले महाराष्ट्राचे माजी मंत्री नवाब मलिक यांच्या जामीन अर्जावर आज न्यायालयात निकाल देण्याची शक्यता होती. हे प्रकरण फरारी गँगस्टर दाऊद इब्राहिम आणि त्याच्या साथीदारांच्या कारवायांशी आहे. परंतु, नवाब मलिक यांना मोठा धक्का बसला आहे. सुनावणीनंतर येथील विशेष न्यायालयाने त्यांचा जामीन अर्ज फेटाळला आहे.
दोन्ही बाजूंचा प्रदीर्घ युक्तिवाद ऐकून विशेष न्यायाधीश आर.एन.रोकडे यांनी १४ नोव्हेंबर रोजी नवाब मलिक यांच्या जामीन अर्जावरील निर्णय राखून ठेवला होता. न्यायालयाने यापूर्वी २४ नोव्हेंबर रोजी आपला आदेश सुनावणार असल्याचे सांगितले होते. मात्र, त्यादिवशी न्यायालयाने आदेश तयार नसल्याचे सांगत प्रकरणाची सुनावणी ३० नोव्हेंबरपर्यंत स्थगित केली होती.
अंमलबजावणी संचालनालय म्हणजेच ईडीने यावर्षी फेब्रुवारीमध्ये राष्ट्रवादी काँग्रेसचे नवाब मलिक यांना मनी लॉंड्रिंग प्रकरणात अटक केली होती. ते न्यायालयीन कोठडीत असून सध्या त्यांच्यावर येथील खासगी रुग्णालयात उपचार सुरू आहेत.
जुलैमध्ये नवाब मलिकांची न्यायालयात याचिका दाखल!
- मलिक यांनी जुलैमध्ये विशेष न्यायालयात नियमित जामीन अर्ज दाखल केला होता.
- मनी लाँड्रिंगचा खटला चालवण्यासाठी त्यांच्याविरुद्ध कोणताही पूर्वनिर्धारित गुन्हा नसल्याचे सांगत राष्ट्रवादीच्या नेत्याने जामीन मागितला.
- मात्र, ईडीने त्यास विरोध केला. ईडीने दावा केला की आरोपी दाऊद इब्राहिम आणि त्याची बहीण हसिना पारकर यांच्यासोबत ते काम करत होते आणि त्यांच्या निर्दोषतेचा प्रश्नच उद्भवत नाही.
Subscribe
