आज जागतिक निद्रा दिन...झोप नसेल येत तर 'हे' नक्की वाचा!

मुक्तपीठ टीम

सर्व विकत घेतं यार…पण झोप नाही! मस्त एसी बेडरूम. मऊ मऊ गादी. सारं केलं. पण पूर्वी गोधडीवर झोप यायची आता ऐशोआरामातही येत नाही. रोजच कानी येणाऱ्या तक्रारी. तशा साध्या वाटतात. पण अपुऱ्यो झोपेचे दुष्परिणाम भीषणच असतात.

आपल्या देशात पूर्वी आयुर्वेदाच्या उपायांनी लोक निरोगी आणि दीर्घ आयुष्य जगत होते परंतु आताच्या धावपळीच्या युगात जीवन जगण्याचा मार्ग बदलला. आजकाल अतिशय व्यग्र जीवनशैलीमुळे अनेकांना आठ तास शांत झोप घेता येत नाही. यंदाच्या जागतिक निद्रा दिनाची थीम ‘नियमित झोप, स्वस्थ भविष्य’ अशी आहे.

‘वर्ल्ड स्लीप डे’ हा दरवर्षी मार्च महिन्यातील तिसर्‍या शुक्रवारी साजरा केला जातो. यावर्षी १९ मार्च म्हणजेच ‘जागतिक निद्रा दिन’ साजरा केला जात आहे. पहिल्यांदा निद्रा दिन २००८ मध्ये साजरा करण्यात आला. धकाधकीचे जीवन, स्पर्धा, महत्वाकांक्षा आणि अज्ञानामुळे आमच्या दोन गरजा आपल्या जीवनात खोलवर आदळल्या आहेत. झोपेचा अभाव ही एक सामान्य समस्या आहे आणि यामागचे कारण व्यक्तीनुसार बदलू शकते.

चांगली झोप येण्यासाठी वेळेवर जेवले पाहिजे. अनियमित अन्न खाणे, जास्त प्रमाणात खाणे किंवा न खाणे यामुळे पचनक्रिया योग्यरित्या कार्य करत नाही. यामुळे झोपही चांगली लागत नाही.

अपुरी झोप, आरोग्याला घोर!

झोपेच्या अभावामुळे आपल्या शरीरावर विपरीत परिणाम होतो शरीराची चयापचय अनियमित होते.
हार्मोन्स आणि एन्झाईम्स त्यांचे कार्य सहजपणे करू शकत नाहीत.
उच्च रक्तदाब, मधुमेह, नैराश्य आणि अनेक प्रकारचे मानसिक रोग होण्याचा धोका असतो.
निद्रानाश विशेषत: त्यांची समस्या आहे.
ज्याची झोपेची वेळ व्यवस्थित नसते.
तणावामुळे झोपेच्या कमतरतेची समस्या देखील कायम आहे.
गंभीर आजारांमध्येसुद्धा रुग्णाला नियमित झोप चांगली येत नाही.

‘हे’ करा, चांगली झोप मिळवा!

झोपेची जागा शांत, स्वच्छ आणि हवेशीर असावी.
झोपेच्या एका तासाच्या आधी टीव्ही, मोबाईल आणि कॉम्प्यूटर बंद करावे.
जर शरीरात कोणतीही समस्या नसल्यास, कोमट दूध रात्री प्यायले पाहिजे.
रात्री झोपेच्या वेळी सुमारे तीन तास आधी अन्न खावे जेणेकरून ते योग्य पचले जाऊ शकेल.
अॅसिडीटी असेल तर मनुके दुधात उकळवावे किंवा चूर्ण, सुतशेखर रसाचा वापर करु शकता.

जागतिक निद्रा दिन

वर्ल्ड स्लीप सोसायटी ही संस्था वर्ल्ड स्लीप डेच्या निमित्ताने अनेक कार्यक्रम आयोजित करते.
पुरेशी झोप न मिळाल्यामुळे लोकांना बर्‍याच आजारांना सामोरं जावं लागतं.
अगदी नकळत या अपुऱ्या झोपेचा आपल्या शरीरावर परिणाम होत असतो.
हे रोखण्यासाठी वर्ल्ड स्लीप सोसायटीने ‘वर्ल्ड स्लीप डे’ साजरा करण्यास सुरुवात केली.
आज जगातील ८८ हून अधिक देशांमध्ये ‘वर्ल्ड स्लीप डे’ साजरा केला जातो.
निरोगी राहण्यासाठी पुरेशी झोप आवश्यक आहे, हे लोकांपर्यंत पोहोचावं, सर्वांना झोपेचं महत्त्व कळावं यासाठीचा हा एक प्रयत्न!