मुक्तपीठ टीम
भाजपानंतर महाविकास आघाडी सत्तेतही नागपूर हे राज्याच्या गृहमंत्र्यांचे शहर आहे. पण नागपूर की क्राइमपूर असा प्रश्न विचारावा अशी गुन्हेगारी तेथे असते. त्यामुळेच नागपुर पोलिस आयुक्त अमितेश कुमार हे गुन्हेगारीला आळा घालण्यासाठी थेट मैदानात उतरले आहेत.
नागपूरमधील गुन्हेगारांना कुणाचाच वचक नसतो असे चित्र नेहमीच दिसते. गेल्या काही दिवसांमध्ये तेथे रक्तरंजित गुन्हेगारी वाढू लागली. गुन्हेगारीमध्ये वाढ झाल्याची गंभीर दखल पोलीस आयुक्त अमितेश कुमारांनी घेतली. आता ते नियमितपणे पोलीस ठाण्यांना भेट देत आहेत. त्यांनी नुकतीच कळमना आणि यशोधरा नगर पोलिस ठाण्यांना भेट दिली. यावेळी त्यांनी पोलिसांकडून केलेल्या गुन्हेगारी नियंत्रण उपायांचा आढावा घेतला.
नारायणपेठमधील विजय वाघधारे यांच्या हत्येनंतर कुमार यांनी शांती नगर पोलिस ठाण्यात भेट दिली. जबाबदारी निश्चित करण्यासाठी अतिरिक्त पोलिस आयुक्त दर्जाच्या अधिकाऱ्यामार्फत चौकशीचे आदेश त्यांनी दिले.
अमितेश कुमार यांनी दिलेल्या माहितीनुसार, सूक्ष्म स्तरावर पोलिसिंगसाठी ‘बीट पेट्रोलिंग’ यंत्रणा बळकट केली जाईल. या आठवड्याच्या सुरूवातीला कुमार यांनी गुन्हे शाखा, आर्थिक गुन्हे शाखा आणि सायबर सेलच्या कामकाजाचा आढावा घेतला होता. गुन्हेगार, त्यांची गुन्हेपद्धती, एकंदरीत गुन्हेगारी आणि ती नियंत्रणात आणण्याच्या रणनितीवर खूप विचारविमर्श करण्यात आला. शहरात अंमलबजावणीसाठी विभागीय उप-पोलिस आयुक्तांसोबत विशिष्ट रणनीतीवरही चर्चा करण्यात आली. पोलीस आयुक्तांनीच मनावर घेतले असल्याने आता तरी नागपूर की क्राइमपूर असा प्रश्न विचारण्याची वेळ येऊ नये, असं वाटतं.
पाहा व्हिडीओ:
Subscribe
