मुक्तपीठ टीम
भाजपच्या केंद्रातील मोदी सरकारचे शेतकरी विरोधी व कॉर्पोरेट धार्जिणे कृषी कायदे मागे घ्यावेत व आधार भावाला कायदेशीर संरक्षण द्यावे या मागण्यांसाठी दिल्ली येथे सुरु असलेले शेतकरी आंदोलनाचा आज ६६ वा दिवस आहे. आंदोलनातील देशद्रोही घुसखोरांचा हिंसाचार, पोलिसांची दडपशाही, गुंडांचे हल्ले सुरु असूनही शेतकरी मात्र आपल्या निर्धारावर ठाम आहेत. गेल्या दोन महिन्यापेक्षा अधिक काळ सुरू आलेले शांततापूर्ण आंदोलन कुटीलपणे बदनाम करून मोडून काढण्यास केंद्र सरकारने सुरुवात केली आहे, असा आरोप शेतकरी नेत्यांनी केला आहे. दडपशाहीचा निषेध करण्यासाठी आज शेतकरी आंदोलक उपोषण करीत आहेत.
भाजपशी संबंधित असलेला अभिनेता दीप सिद्धू व संयुक्त किसान मोर्चाचा भाग नसलेल्या व आंदोलनात गडबड घडवून आणण्यासाठीच आंदोलनात उतरविण्यात आल्याचा आरोप शेतकरी नेत्यांनी केला आहे. त्याच्या किसान मजदूर संघर्ष कमिटीला हाताशी धरून २६ जानेवारी २०२१ रोजी प्रजासत्ताक दिनी दिल्लीत हिंसाचार घडवून आणला, लाल किल्ल्यावरही अत्यंत आक्षेपार्ह कृत्य केले, शेतकरी आंदोलकांवर पोलिसांच्या उपस्थितीत हल्ले केले जात आहेत, असा आरोप किसान सभेचे नेते कॉ. अजित नवले यांनी केला आहे. दडपशाहीचा निषेध करण्यासाठी आज राष्ट्रपिता महात्मा गांधींच्या पुण्यतिथीस सदभावना दिवस पाळला जात आहे. सकाळी ९ पासून शेतकरी आंदोलक व समर्थकांनी उपोषण सुरु केले आहे. आज सायंकाळी ५ पर्यंत हे उपोषण केले जात आहे.
किसान सभेचे निवेदन
आजच्या उपोषणाबद्दल किसान सभेने केलेले निवेदन जसं आहे तसं:
दुसऱ्या बाजूला संयुक्त किसान मोर्चाने प्रजासत्ताक दिनी आपल्या मागण्यांच्या समर्थनार्थ अत्यंत शांततेत अभूतपूर्व ट्रॅक्टर मार्च काढला. एक लाख ट्रॅक्टर व सात लाख शेतकरी या ट्रॅक्टर मार्चमध्ये सहभागी झाले. भाजपच्या आय टी सेलने मात्र अत्यंत शांततेत पार पडलेल्या ट्रॅक्टर मार्चकडे देशवासीयांचे लक्ष जाऊ नये यासाठी दिल्ली येथे दीप सिद्धू, किसान मजदूर संघर्ष कमिटी आणि पोलीस यांनी घडविलेला हिंसाचार चित्रित करून तो देशभर प्रसारित केला.
शेतकऱ्यांचे दोन महिन्यापेक्षा अधिक काळ सुरू असलेले शांततामय आंदोलन पहिल्यांदा बदनाम करायचे व नंतर बळाचा वापर करून ते मोडून काढायचे या षडयंत्राचा भाग म्हणूनच हे सारे करण्यात आले. दुसऱ्या दिवशी या रणनीतीनुसार पलवल बॉर्डर व गाजीपुर बॉर्डरवर सरकारने पोलीस बळाचा वापर करून येथे बसलेल्या शेतकऱ्यांचे आंदोलन उधळून लावण्याचा प्रयत्न केला. गाजीपूरमध्ये हा प्रयत्न हाणून पाडण्यात आला.
सरकारने शेतकऱ्यांच्या मागण्या मान्य करण्याऐवजी आंदोलन मोडीत काढण्यासाठी हिंस्र व कुटील मार्गाचा अवलंब केला आहे. जे.एन.यु. मधील विद्यार्थ्यांचे आंदोलन व सी.ए.ए. विरोधातील दिल्ली आंदोलन सरकारने अशाच प्रकारे हिंसेचा वापर करत मोडून काढले होते. सरकार व भाजप आता शेतकऱ्यांचे आंदोलनही याच प्रकारे हाताळत आहे.
संयुक्त किसान मोर्चा, अखिल भारतीय किसान संघर्ष समन्वय समिती आणि अखिल भारतीय किसान सभा सरकारच्या कृतीचा धिक्कार करत आहे. महात्मा गांधी यांच्या हौतात्म्यदिनी आज देशभर एक दिवसाचा उपवास करून, सभा घेऊन, धरणी धरून शेतकरी, शेतमजूर, कामगार, महिला, युवक, विद्यार्थी व समाजसेवी संघटना सरकारच्या या कारस्थानाचा जोरदार निषेध करत आहेत. महाराष्ट्रातही सर्वत्र अशा प्रकारे निषेध करण्यासाठी संयुक्त शेतकरी कामगार मोर्चा, महाराष्ट्र राज्य किसान सभा आणि सर्व समविचारी संघटना एकवटल्या आहेत.
Subscribe
