मुक्तपीठ टीम
भारतात लसीकरणीची मोहीम धडाकेबाज पद्धतीने राबवली जात असतानाच दुसरीकडे लसीची टंचाईची समस्याही भेडसावत आहे. त्यामुळे अनेक ठिकाणी लसीकरणाची गती मंदावत असतानाच आता एक चांगली बातमी आली आहे ती आणखी पाच नव्या लसी भारतात उपलब्ध होणार असल्याची. तसेच सर्वात सोपी ठरणारी पोलियो ड्रॉप्सप्रमाणे घेण्याची सुविधा असलेली ओरल लसही काही महिन्यातच येणार आहे. सर्वात महत्वाचं म्हणजे ती लस मेड इन इंडिया असणार आहे. को-व्हॅक्सिन बनवणारी भारत बायोटेक ही कंपनी ती लस बनवण्याच्या प्रयत्नात आहे.
सूत्रानी दिलेल्या माहितीनुसार, यावर्षी ऑक्टोबरपर्यंत पाच नवीन कोरोना लसही भारतात उपलब्ध होतील. सध्या देशात कोव्हिशिल्ड आणि कोव्हॅक्सीन लस देण्यात येत आहे. लसीची कमतरता दूर करण्यासाठी येत्या दहा दिवसांत केंद्र सरकारने रशियाची कोरोना लस स्पुतनिक -5 ला मान्यताही दिली जाण्याची शक्यता आहे. असे झाल्यास मोठ्या संख्येने लोकांचे लसीकरण होईल आणि त्यातही वाढ होईल.
यावर्षी ऑक्टोबरपर्यंत भारतात उपलब्ध होणाऱ्या कोरोना लसमध्ये जॉन्सन अँड जॉन्सनची कोरोना लस, नोव्हावॅक्स लस, जायडस कॅडिला लस आणि भारत बायोटेकची इंट्रानेसल लसींचा समावेश आहे. जोपर्यंत स्पुतनिकचा प्रश्न आहे लस जूनपर्यंत भारतात उपलब्ध होऊ शकेल. जॉन्सन अँड जॉन्सन लस आणि जायडस कॅडिला लस बहुदा ऑगस्टमध्ये येईल. नोव्हॅवॅक्स सप्टेंबर आणि ऑक्टोबरमध्ये भारतात उपलब्ध होईल. रशियन डायरेक्ट इन्व्हेस्टमेंट फंडने (आरडीआयएफ) लस उत्पादनासाठी भारतातील अनेक फार्मा कंपन्यांशी करार केला आहे.
भारतात यावर्षी फेब्रुवारीपासून कोरोना संसर्गाचे प्रमाण झपाट्याने वाढले आहे. रोज लाखाहून अधिक नवीन प्रकरणे उघडकीस आल्यानंतर सरकार हाय अलर्टवर आहेत. बर्‍याच राज्यांनी आपले निर्बंध वाढवले आहेत, तर काही राज्यांनी त्यांच्या काही शहरांमध्ये शनिवार व रविवार लॉकडाउन लादले आहेत. खबरदारी म्हणून अनेक राज्यांनी शैक्षणिक संस्था पूर्णपणे बंद केल्या आहेत.
पाहा व्हिडीओ:
Subscribe
