पाच हजार इंटर्न डॉक्टर्सचे आंदोलन! काळ्या फिती बांधून रुग्णालयात काम!

मुक्तपीठ टीम

कोरोनासंकटाशी सामना करण्यात स्वत:चे जीव धोक्यात टाकणारे राज्यातील डॉक्टर आता सरकारवर नाराज होऊ लागले आहेत. आज मुंबईसह राज्यातील वैद्यकीय महाविद्यालये आणि रुग्णालयात इंटर्न असलेल्या डॉक्टरांनी सरकारविरोधात आंदोलन सुरु केले आहे.

डॉक्टरांच्या मागण्या काय?

• कोरोना रूग्णांना सेवा देणाऱ्या या इंटर्न डॉक्टरांचा सरकारवर कायम दुर्लक्षाचा आरोप आहे.
• त्यांनी राज्य सरकारकडे अनेक वेळा कोरोना मानधन, विमा संरक्षण देण्याची मागणी केली आहे.
• या मागणीकडे सतत दुर्लक्षच करण्यात आले आहे.

त्यातच लातूरमधील एका डॉक्टरने प्राण गमावल्याने संताप वाढला आहे. त्यामुळेच सरकारी कारभाराविरोधात तीव्र नाराजी व्यक्त करण्यासाठी इंटर्न डॉक्टर्स काळ्या फिती बांधत रुग्णालयात काम करत आहेत.

इंटर्न डॉक्टरच्या मृत्यूमुळे संताप

• लातूरच्या मीमर मेडिकल कॉलेजमध्ये इंटर्न डॉक्टर राहुल पवार यांचे कोरोना आणि काळी बुरशीग्रस्त रूग्णांची सेवा करताना निधन झाले.
• या मृत्यूमुळे सरकारविरूद्ध इंटर्न डॉक्टरांमध्ये संताप व्यक्त केला जात आहे.
• इंटर्न डॉक्टरांची संस्था असलेल्या एएसएमआयने राज्य सरकारविरोधात आंदोलन सुरु केले आहे.
• संस्थेचे अध्यक्ष डॉ. प्रितीक देबाजे म्हणाले की, मुंबईसह राज्यातील सर्व वैद्यकीय महाविद्यालये व रुग्णालयात ५,५०० इंटर्न डॉक्टर आहेत.
• गेल्या एक वर्षापासून ते कोरोना रुग्णांवर उपचार करीत आहेत.
• डॉ. प्रितीक यांनी सांगितले की, लातूर मेडिकल कॉलेजमध्ये इंटर्नशिप घेत असलेले इंटर्नल डॉक्टर राहुल पवार यांना उपचाराच्या खर्चासाठीदेखील त्रास झाला.
• त्यामुळे इंटर्न डॉक्टर सरकारवर संतप्त आहेत.

हे सर्व डॉक्टर, त्यांच्या वैद्यकीय महाविद्यालय व रुग्णालयात राहुल पवार यांना श्रद्धांजली वाहिल्यानंतर काळ्या फिती बांधून रूग्णांवर उपचार करत आहेत.