मुक्तपीठ टीम
देशात कोरोनाची दुसरी लाट मंदावत आहे. देशभर कोरोना नियंत्रणामुळे मुंबई मॉडेलचं कौतुक झालं. त्या मुंबई मनपाने आता कोरोनाच्या तिसऱ्या लाटेशी सामना करण्याची तयारी सुरू केली आहे. मुंबई मनपा नवजात बाळांसाठी अर्जेंटिनामधून २२ इंटेंसिव्ह केअर व्हेंटिलेटर्स आयात करणार आहे. नवजात शिशुंच्या देखभालीसाठी व्हेंटिलेटर आयात करण्यात येणार आहेत. कोरोना संसर्गित मुलांसाठी तयार असलेल्या बालरोग विभागात हे स्थापित केले जाणार आहे. टेकमे निर्मित या प्रत्येक व्हेंटिलेटरची किंमत १३ लाख रुपये आहे.
मुलांसाठीचे व्हेंटिलेटर्स कुठे असणार?
• दोन महिन्यांत व्हेंटिलेटर बसविणे अपेक्षित आहे.
• महानगरपालिकेच्या स्थायी समितीने नुकतेच नवजात बाळांच्या देखभालीसाठी व्हेंटिलेटर्सची ऑर्डर देण्यास मान्यता दिली आहे.
• अधिकाऱ्यांनी सांगितले की, गंभीररित्या आजारी असलेल्या नवजात शिशुंसाठी किंवा श्वसनाच्या अडचणी असलेल्या मुलांच्या देखभालीसाठी व्हेंटिलेटर वापरण्यात येतील.
• हे व्हेंटिलेटर्स कोरोना रुग्णालये, जुन्या आणि नवीन जंबो सेंटरमध्ये बसवले जातील.
• या केंद्रांमध्ये मुलांसाठी कोरोना वॉर्ड असतील.
वैद्यकीय शिक्षण व संशोधन संचालनालयाचे प्रमुख डॉ. तात्याराव लहाने यांनी दिलेल्या माहितीनुसार, “संपूर्ण आरोग्य सेवा यंत्रणा मूलभूत सुविधा, औषधे आणि उपकरणे यांच्या सोयी-सुविधा तिसऱ्या कोरोना लाटेपूर्वी करण्यात येत आहेत. तसेच, वैद्यकीय कर्मचार्‍यांना उच्चस्तरीय प्रशिक्षणही देण्यात येत आहे.”
Subscribe
