उदयराज वडामकर / कोल्हापूर
कर्नाटकात काही समाजकंटकांनी छत्रपती शिवाजी महाराजांच्या प्रतिमेची विटंबना केली. त्याविरोधात सर्वत्र संताप व्यक्त केला जात आहे. कोल्हापुरात मात्र एक वेगळा प्रयत्न झाला. संताप व्यक्त करतानाच शिवरायांची थोरवी मांडण्यासाठी सोमवारी रात्री तिथे छत्रपती शिवाजी महाराजांच्या चित्राचा ४०० चौरस फुटांचा भव्य फलक उभारण्यात आला. शिवसेनेचे माजी आमदार आणि राज्य नियोजन मंडळाचे कार्यकारी अध्यक्ष राजेश क्षीरसागर यांच्याहस्ते श्रीफळ वाढवून त्याचे उद्घाटन करण्यात आले. छत्रपतींच्या जयजयकाराच्या घोषणांनी आसमंत दणाणून गेला. यावेळी शिवसेना नेते राजेश क्षीरसागर यांनी शिवद्रोह करणाऱ्या आरोपींना कोल्हापुरात आणून अद्दल घडवण्याचा इशारा दिला.
कोल्हापूरमध्ये कर्नाटकात घडलेल्या घटनेच्या निषेधार्थ संताप व्यक्त होत आहे. रोजच वेगवेगळ्या मार्गाने तो व्यक्त होत असतानाच महाराजांची थोरवी जगासमोर सकारात्मकरीत्या मांडण्यासाठी छत्रपती शिवाजी चौकात १०० फूट उंची आणि ४० फूट रुंदीचा भव्य फलक तयार करण्यात आला. सोमवारी रात्री तो चारशे चौरस फुटांचा भव्य शिवफलक क्रेनने उभारण्यात आला. तिथं जमलेल्या शिवप्रेमींनी शिवरायांचा जयघोष केला. शिवरायंची थोरवी गाणारी आरती, इतर गीते सादर करण्यात आली.
कोल्हापुरच्या छत्रपती शिवाजी महाराजांच्या चौकांमध्ये शिवाजी महाराज की जय ,जय भवानी जय छत्रपती शिवाजी महाराजाचा जयघोष सुरु होता. नेत्रदीपक लेसर व साऊंड सिस्टिमचा नाद, शिवभक्तांचा सळसळता उत्साह यामुळे वातावरण शिवमय झाले होते. कर्नाटक सरकारचा निषेध नोंदवण्यासाठी करण्यात आलेला हा सकारात्मक प्रयत्न शिवसेना नेते, राज्य नियोजन मंडळाचे कार्यकारी अध्यक्ष राजेश क्षीरसागर यांच्या मार्गदर्शनाखाली करण्यात आला.
आंदोलनास हरकत नाही पण साऊंड सिस्टिम वाजवण्यास गुन्हे नोंद करण्याचा इशारा पोलीस प्रशासनाने दिला होता. मात्र शिवप्रेमींना दणक्यातच करण्याचे ठरवल्याने ते आणि पोलिसांमध्ये तणाव निर्माण झाला होता. मात्र, अखेर त्यावरही मार्ग निघाला.
Subscribe
