वर्धा गर्भपात प्रकरणातील डॉ. नीरज कदमच्या घरात शासकीय औषधांचा साठा कसा? कोण सरकारी साथीदार?

मुक्तपीठ टीम

राज्यात गाजत असलेल्या आर्वी येथील अवैध गर्भपात प्रकरणात आरोपी डॉ.नीरज कदम यांना अटक केली आहे. त्यानंतर वर्धा जिल्हा सत्र न्यायालयाने डॉ नीरज कदम यांना १८ जानेवारीपर्यंत पोलीस कोठडी सुनावली आहे. तेथे त्यांची चौकशी सुरू आहे. अल्पवयीन मुलीच्या भ्रूणहत्येनंतर उघडकीस आलेल्या गर्भपात प्रकरणातील आरोपींची संख्या ६ झाली आहे. तसेच शनिवारी कदम यांच्या रुग्णालयासह घरात जिल्हा आरोग्य विभागाच्या टास्क फोर्ससह पोलिसांनी झडती घेतली. यात पथकाला मोठ्या प्रमाणात शासकीय औषधांचा साठा सापडला. हा साठा त्याच्याकडे आला कसा, अशी चर्चा सुरु आहे. त्यामुळे सरकारी आरोग्य व्यवस्थेतील काही सरकारी अधिकारी, कर्मचारी त्याचे साथीदार असण्याची शक्यता आहे.

कदम यांच्या रुग्णालयासह घरात शासकीय औषधांचा साठा!

आर्वी येथील गर्भपात प्रकरणात तपासादरम्यान अनेक बाबी समोर येत आहे.
तपासणीदरम्यान मालाईन ड्रगचे २३ खोके, त्यात औषधीचे एकूण २ हजार ५६३ पॅकेट, असे एकूण ७१ हजार ७६४ गोळ्या आढळळ्या आहेत.
तर ऑक्सिटिन नामक ९० इंजेक्शन सुद्धा जप्त करण्यात आले आहे.
ही सर्व औषधी शासकीय रुग्णालयातील असल्याची माहिती मिळतेय.
महत्वाची बाब म्हणजे ही सर्व औषधे मुदतबाह्य असल्याची बाबही समोर आली आहे.
शनिवारी सकाळपासून सुरु असलेली तपासणी रात्री उशीरापर्यंत सुरु होती.
या दरम्यान रुग्णालयातील ऑपरेशन रजिस्टर, एमटीपी रजिस्टर यासह काही फाईल आणि रजिस्टर जप्त केले आहे.
रुग्णालयाच्या वरच डॉ. कदम यांचे घर असल्याने तेथेही शुक्रवारी तपासणी करण्यात आलीय.
घरात तपासणी केली असता पोलिसांना एक कळवीटची कातडी तसंच अन्य बरंच साहित्य मिळाले.
डॉ. कदम यांच्या आई नागपूर येथे रुग्णालयात दाखल आहेत, तिथे त्यांचे वडील असल्याने घराच्या एका खोलीला टाळे होते.
त्या खोलीत काय दडलं आहे हे अद्याप समोर आलं नाही.

आर्वी येथील आरोग्य विभागसुद्धा संशयाच्या भोवऱ्यात

या प्रकरणात दररोज नवनवीन खुलासे होत आहे.
अटक केलेले डॉ. नीरज कदम हे आर्वी येथील उपजिल्हा रुग्णालयात कंत्राटी डॉक्टर म्हणून कार्यरत आहेत.
कदम रुग्णालयाच्या तपासणीदरम्यान सरकारी दवाखान्यात वापरण्यात येणारी औषधं कदम रुग्णालयात आढळल्याने आता आर्वी येथील आरोग्य विभागसुद्धा संशयाच्या भोवऱ्यात सापडला आहे.