World Heart Day 2022: काही चांगलं खा…घरगुती उपायांनी घ्या हृदयाची काळजी…

मुक्तपीठ टीम

दरवर्षी २९ सप्टेंबर रोजी जागतिक हृदय दिन साजरा केला जातो. जगभरात जागतिक हृदय दिन साजरा होत असताना भारतात वाढत्या हृदय रोगाचे प्रमाण हे निश्चितच धोक्याची सुचना आहे. जर योग्य काळजी घेतली तर आपण हृदयरोगास निश्चितच टाळू शकतो. जेव्हा हृदय निरोगी असते, तेव्हा आपल्या शरीरातील सर्व प्रक्रिया व्यवस्थित चालू राहतात. हृदयाचे आरोग्य हे तुम्ही कोणत्या प्रकारचे जीवन जगता यावर अवलंबून असते. मात्र, त्यासाठी प्रतिबंधात्मक नियम पाळणे आवश्यक आहे.

आपण हृदयरोग टाळण्यासाठी निश्चितच प्रयत्न केला पाहिजे. त्यासाठी सकस आणि पोषक आहाराचे सेवन करणे अत्यंत आवश्यक आहे.

हृदय निरोगी ठेवण्यासाठी कोणत्या पदार्थांचे सेवन करावे?

१. फळ आणि भाज्या

• फळे आणि भाज्या दोन्हीमध्ये सॅच्युरेटेड फॅट कमी असते. यामुळे तुमचे कोलेस्ट्रॉल वाढू शकत नाही.
• यासोबतच फळे आणि भाज्यांमध्ये विरघळणारे फायबर जास्त असते, त्यामुळे पोट लवकर भरते आणि बराच वेळ भरलेले राहते.

२. लसूण

• लसूण अतिशय आरोग्यदायी आणि औषधी आहे, जे अनेक रोगांपासून संरक्षण तर करतेच, पण हृदयालाही निरोगी ठेवते. . यामध्ये असलेले औषधी गुणधर्म जसे की अँटिऑक्सिडेंट, अँटीफंगल, व्हिटॅमिन सी, बी, कॅल्शियम, सेलेनियम, मॅंगनीज हे कोलेस्ट्रॉलची पातळी वाढू देत नाहीत.
• यामुळे हृदयाच्या धमन्यांमध्ये ब्लॉकेज होत नाही. भाजीमध्ये घालण्यासोबतच लसणाच्या दोन ते तीन पाकळ्या सकाळी रिकाम्या पोटी कच्च्या चावून खाव्यात.

३. बदाम

• बदाम अनेक प्रकारच्या पोषक तत्वांनी समृद्ध असतात.
• यात जीवनसत्त्वे आणि खनिजे आहेत, जे हृदयाच्या आरोग्यासाठी महत्वाचे आहे.
• बदाम देखील मोनोअनसॅच्युरेटेड फॅट आणि फायबरचा चांगला स्रोत आहे.
• हे दोन्ही अतिशय महत्त्वाचे पोषक आहेत, ज्यामुळे हृदयविकाराचा धोका कमी होतो.
• बदाम खाल्ल्याने कोलेस्ट्रॉलची पातळीही सामान्य राहते.

४. गाजर

• गाजराचा रस आणि कोशिंबीर देखील खूप फायदेशीर आहे.
• त्यात कॅल्शियम आणि पोटॅशियम, फायबर आणि अँटिऑक्सिडंट्ससह जीवनसत्त्वे सी, के, बी१, बी२ आणि बी६ असतात.
• यामध्ये अल्फा आणि बीटा कॅरोटीन असते जे हृदयरोगांपासून संरक्षण करण्यास मदत करते. त्यामुळे आहारात गाजराचा नक्कीच समावेश करा.

५. व्हर्जिन ऑलिव्ह तेल

• व्हर्जिन ऑलिव्ह ऑइल हृदयासाठी आरोग्यदायी आहे, जे शरीराला मोनोअनसॅच्युरेटेड फॅट्स प्रदान करते.
• ऑलिव्ह ऑइल व्यतिरिक्त इतर तेलांमध्ये ट्रान्स फॅट्सचे प्रमाण जास्त असते, ज्यामुळे कोलेस्ट्रॉल वाढते आणि रक्ताच्या गुठळ्या होण्याचा धोका असतो.

हृदय निरोगी ठेवण्यासाठी कोणती काळजी घ्यावी?

• व्यायामाला आपल्या जीवनाचा नियमित भाग बनवा.
• आपला आहार संतुलित करा.
• रक्तदाब नियंत्रित ठेवा.
• आवश्यकतेनुसार वजन कमी करण्याचे कार्य करा.
• दररोज रात्री पुरेशी झोप घ्या.