रोहिणी ठोंबरे
आपला देश सध्या कोरोनाशी युद्ध लढत आहे. या युद्धात ऑक्सिजन हे एक प्रभावी शस्त्र आहे. कोरोना रुग्णांचे श्वास सुरु ठेवत मृत्यूला रोखणारे. पण तोच ऑक्सिजन सध्या कमी पडतो आहे. त्यामुळे अनेक सेलिब्रिटीही ऑक्सिजन मिळवून देण्यासाठी पुढे सरसावलेत. अभिनेता हर्षवर्धन राणेही अशा रिअल हिरोंपैकीच एक. फिटनेस प्रमाणेच हर्षवर्धनला बाइकही जाम आवडतात. पण त्याने हैद्राबादमधील एका गरजूला ऑक्सिजन मिळवून देण्याच्या बदल्यात आपली बाइक देण्याची ऑफर करणारी पोस्ट इंस्टावर शेअर केली. त्याच्या त्या ऑफरबद्दल चाहत्यांनी त्याचं खूपच कौतुक केलं आहे.
हर्षवर्धनची इंस्टा पोस्ट
हर्षवर्धन राणे यांनी आपल्या पोस्टमध्ये लिहिले आहे की, “मी ऑक्सिजन सिलिडरच्या बदल्यात माझी मोटरसायकल देण्यास तयार आहे, ऑक्सिजन सिलिंडरच्या सहाय्याने आम्ही गरजू रुग्णांना मदत करू आणि कोरोनाशी युद्ध लढू. कृपया मला हैदराबादमध्ये ऑक्सिजन सिलिंडर शोधण्यात मदत करा.” असे त्याने त्याच्या पोस्टमध्ये लिहिले आहे.
ऑक्सिजन द्या, बाईक घ्या!
हर्षवर्धनला मोटरसायकलीबद्दल खूप प्रेम आहे. हर्षवर्धन अनेकदा मोटरसायकवरून प्रवास करताना दिसतोच दिसतो. सोशल मीडियावर त्याचे बाइकसोबतचे असणारे फोटोही शेअर करतो. कोरोनाविरूद्धच्या सुरू असलेल्या या लढाईत हर्षवर्धन यांच्या या ऑक्सिजनच्या बदल्यात बाइक आवाहनाचे चाहते कौतुक करीत आहेत.
हर्षवर्धन एक फिटनेस फ्रिक आहे
हर्षवर्धन एक फिटनेस फ्रिक आहे. त्याने सनम तेरी कसम, पल्टन, तैश आणि हसीन दिलरुबा यांच्यासह अनेक चित्रपटात आपल्या भूमिकेने प्रेक्षकांची मने जिंकली. हर्षवर्धन अनेकदा फिटनेसचे वेगवेगळे व्हिडीओ सोशल मीडियावर शेअर करतो, जे चाहत्यांना खूप आवडतात.
Subscribe
