सरकार म्हणते देशासाठी प्राणांचं बलिदान करणाऱ्या जवानांना शहीद नाही म्हणायचं! आता मग काय म्हणायचं?

मुक्तपीठ टीम

देशासाठी प्राणांची आहुती देणाऱ्या भारतीय सशस्त्र दलांना शहीदाचा दर्जा दिला जात नाही. यावर पुन्हा एकदा स्पष्टीकरण देताना सरकारने संसदेत म्हटले आहे की, संघर्ष किंवा बंडखोरीविरोधी कारवायांमध्ये प्राण गमावलेल्या सैनिकांसाठी ‘शहीद’ हा शब्द वापरला जात नाही. तृणमूल काँग्रेसचे खासदार शंतनू सेन यांनी संसदेत हा प्रश्न उपस्थित केला होता, ज्याच्या उत्तरात संरक्षण राज्यमंत्री अजय भट्ट यांनी याचा वापर चुकीचा असल्याचे म्हटले आहे.

लष्कराने पत्र लिहून आक्षेप व्यक्त केला

• यासाठी सरकारने लष्कराचा हवाला दिला आहे.
• सरकारच्या म्हणण्यानुसार, लष्करानेच आपल्या सर्व कमांडोंना पत्र लिहून सैनिकाला शहीद म्हणण्यास नकार दिला आहे.
• लष्कराच्या पत्रानुसार, सैनिकाच्या या बलिदानाला ‘शहीद’ म्हणणे चुकीचे आहे.

लष्कराचा असा विश्वास आहे की ‘शहीद’ हा शब्द शिक्षा म्हणून मरण पावलेल्या व्यक्तीसाठी किंवा ज्याने धर्मासाठी बलिदान देण्यास नकार दिला किंवा त्याच्या राजकीय किंवा धार्मिक विचारसरणीसाठी मारल्या गेलेल्या व्यक्तीसाठी वापरला जातो. या पत्रात पुढे म्हटले आहे की, देशाची एकता आणि प्रादेशिक अखंडता आणि संविधानाचे रक्षण करण्यासाठी सैनिकांनी अनेक वेळा आपल्या प्राणांची आहुती दिली आहे आणि भारतीय सशस्त्र दल नेहमीच धर्मनिरपेक्ष आणि अराजकीय राहिले आहे.

लष्कराने ‘सहा’ शब्द सुचवले

• विशेष म्हणजे लष्कराने जारी केलेल्या या पत्रात प्राण गमावलेल्या या सर्व जवानांसाठी काही शब्द वापरण्याची सूचनाही करण्यात आली आहे.
• देशाच्या सुरक्षा आणि अखंडतेसाठी बलिदान देणाऱ्या सैनिकांसाठी सहा शब्दांचा वापर सुचवण्यात आला आहे.
• यामध्ये किल्ड इन अॅक्शन (डेथ इन अॅक्शन), सुप्रीम सॅक्रिफाइस फॉर नेशन (राष्ट्रासाठी सर्वोच्च बलिदान), ले डाउन देअर लिव्ह्स (आपल्या जीवनाचे बलिदान), फॉलन हिरो (युद्धात मारले गेलेले वीर), इंडियन आर्मी ब्रेव्ह्स (इंडियन आर्मीचे वीर), फॉलन सोल्जर्स (ऑपरेशनमध्ये मारले गेलेले सैनिक) असे हे सहा शब्द सुचवलेले आहेत.