सेवानिवृत्त ज्येष्ठ नागरिकांना साठीनंतरही सरकारकडून नोकरीची संधी

मुक्तपीठ टीम

निवृत्त असणाऱ्या ज्येष्ठ नागरिकांसाठी नोकरीची एक चांगली संधी आहे. सरकारने अशा लोकांसाठी खास एक पोर्टल तयार केले आहे. यावर एक ऑक्टोबरपासून नोंदणी करता येईल. देशातील अशा प्रकारची ही पहिली रोजगार संधी आहे. या पोर्टलला सॅक्रेड म्हणजेच सिनीयर एबल सिटीझन फॉर रिएम्पॉयमेंट इन डिग्निटी असे नाव देण्यात आले आहे. हे सामाजिक न्याय आणि अधिकारिता मंत्रालयाने तयार केले आहे.

साठ वर्षांवरील लोक त्यात नोंदणी करू शकतात. यामुळे त्यांना व्हर्च्युअल मॅचिंगच्या आधारावर रोजगाराची संधी मिळेल. मंत्रालयाचे सचिव आर सुब्रमण्यम म्हणाले की, ही देवाणघेवाण एक परस्परसंवादी व्यासपीठ बनेल जिथे भागधारक एकमेकांना प्रत्यक्ष भेटू शकतील आणि भविष्यातील कृती ठरवू शकतील. नियोक्त्यांना एक्सचेंजवर आणण्यासाठी मंत्रालयाने सीआयआय, फिक्की आणि एसोचॅम आणि इतर संस्थांना पत्र लिहिले आहे.

कशी मिळणार नोकरी?

हे पोर्टल लाईव्ह झाल्यानंतर ज्येष्ठ नागरिक त्यात नोंदणी करू शकतात.
यासाठी त्यांना त्यांचे शिक्षण, अनुभव, कौशल्य यांची माहिती द्यावी लागते.
तसेच, ते कोणत्या क्षेत्रात काम करण्यास इच्छुक आहेत हे सांगितले पाहिजे.
जॉब प्रोव्हायडरला कामाचा प्रकार आणि ते पूर्ण करण्यासाठी किती लोकांची गरज आहे हे सांगावे लागते.
या कामात ज्येष्ठ नागरिकांना मदत करण्यासाठी स्वयंसेवी संस्थांची मदत घेतली जाईल.

तसेच, मंत्रालयाने स्पष्ट केले आहे की एक्सचेंज म्हणजे नोकरीची हमी नाही. देशातील वृद्धांची वाढती लोकसंख्या पाहता हे पोर्टल महत्त्वाचे मानले जात आहे.