मुक्तपीठ टीम
जगात कोरोनाचे थैमान सुरु असताना भारतात कदाचित सर्वाधिक मृत्युदर राहील अशी परिस्थिती होती. परंतु पीपीई किट परिधान करून डॉक्टर्स, निवासी डॉक्टर तसेच नर्सेस, पोलीस, स्वच्छता कर्मी यांसह सर्व कोरोना योद्ध्यांनी समर्पण भावनेने अद्भुत काम केल्यामुळेच देशातील मृत्युदर नियंत्रणात राहिला असे प्रतिपादन राज्यपाल भगत सिंह कोश्यारी यांनी केले.
राज्यपाल कोश्यारींच्या पुढाकाराने राजभवन येथे आयोजित ‘कृतज्ञता’ सोहळ्यात विविध क्षेत्रातील नामवंत डॉक्टरांचा राज्यपालांच्या हस्ते प्रशस्तीपत्र देऊन सत्कार करण्यात आला, त्यावेळी ते बोलत होते. कोरोना काळात सर्वत्र परीक्षा नको असा सूर असताना आपण परीक्षा घेण्याबाबत आग्रही राहिलो आणि वैद्यकीय परीक्षांसह सर्व परीक्षा घेतल्या गेल्या. त्यामुळे विद्यार्थ्यांचे नुकसान झाले नाही व अधिक डॉक्टर्स उपलब्ध झाले असे राज्यपालांनी सांगितले.
आजही जगातील कोरोना केसेसची आकडेवारी चिंताजनक असल्याचे सांगून नागरिकांनी कोविड प्रतिबंधक आचरण पाळण्याबाबत डॉक्टरांनी जनजागृती करावी अशी सूचना राज्यपालांनी यावेळी केली. जागतिक आकडेवारीनुसार आजही जगात १.७० कोटी ऍक्टिव्ह कोरोना केसेस असून दररोज ४ लाख केसेस समोर येत आहेत. त्यामुळे कोरोना विरोधातील पवित्रा कायम ठेवावा लागेल असा इशारा नेत्रशल्य चिकित्सक डॉ.केकी मेहता यांनी यावेळी दिला.
राज्यपालांच्या हस्ते डॉ. केकी मेहता, डॉ. मिलिंद कीर्तने, डॉ. शशांक जोशी व डॉ. अमित मायदेव, केईएम हॉस्पिटलचे त्वचारोग तज्ज्ञ डॉ. उदय खोपकर, फोर्टिस हॉस्पिटलचे संचालक डॉ. राहुल पंडित, बीकेसी जम्बो कोविड सेन्टरचे डॉ. राजेश ढेरे, वाडीया हॉस्पिटलच्या मुख्य कार्यकारी अधिकारी डॉ. मिनी बोधनवाला, बॉम्बे हॉस्पिटलचे कान नाक घसा तज्ज्ञ डॉ. राजीव नेरुरकर, लीलावती हॉस्पिटलचे डॉ. तुषार रेगे, बॉम्बे हॉस्पिटलचे अस्थिरोग तज्ज्ञ डॉ. सुजित कोरडे, रिलायंस हॉस्पिटलच्या डॉ. रेखा डावर, बॉम्बे हॉस्पिटलचे डॉ. विक्रम करमरकर, मित्तल हॉस्पिटलचे डॉ. विनायक तायडे यांचा सत्कार करण्यात आला.
युवा हृदयरोग तज्ज्ञ डॉ. समीर पागाद यांनी प्रास्ताविक केले तर राज्यपालांच्या उपसचिव प्राची जांभेकर यांनी आभार प्रदर्शन केले.
Subscribe
