मुक्तपीठ टीम
सामाजिक न्याय विभागांतर्गत स्वयंसेवी संस्थांमार्फत चालविण्यात येणाऱ्या अनुदानित वसतिगृहांच्या कर्मचाऱ्यांच्या मागण्यांबाबत लवकरच उपमुख्यमंत्री यांच्या प्रमुख उपस्थितीत बैठक घेऊन सकारात्मक निर्णय घेण्यात येणार असल्याची माहिती सामाजिक न्याय व विशेष सहाय्य मंत्री धनंजय मुंडे यांनी दिली.
मंत्रालयात अनुदानित वसतिगृहांच्या कर्मचाऱ्यांच्या मागण्यांबाबत आयोजित बैठकीत मंत्री धनंजय मुंडे बोलत होते. यावेळी सामाजिक न्याय आणि विशेष सहाय्य विभागाचे प्रधान सचिव श्याम तागडे, विभागाचे अधिकारी व कर्मचारी संघटनेचे प्रतिनिधी उपस्थित होते.
मंत्री धनंजय मुंडे म्हणाले की, सामाजिक न्याय विभागांतर्गत स्वयंसेवी संस्थांमार्फत चालविण्यात येणारी २३८८ अनुदानित वसतिगृहे कार्यरत आहेत. त्यामध्ये मुलींसाठी ५७८ आणि मुलांसाठी १८१० अनुदानित वसतिगृहे आहेत. या वसतिगृहांची एकूण मान्य विद्यार्थी संख्या ९९ हजार ५५२ इतकी आहे.
या वसतिगृहातील कर्मचाऱ्यांना मानधनाऐवजी वेतन श्रेणी लागू करण्याबाबत व अन्य मागण्यांबाबत शासन सकारात्मक निर्णय घेईल. तसेच या बाबतीत वित्त विभागाशी लवकरच बैठक आयोजित करण्यात येणार असल्याचे ही धनंजय मुंडे यांनी यावेळी सांगितले.
Subscribe
