फडणवीस म्हणाले 'ते' ५५ लाख मलिकांचं संकट वाढवणार?

मुक्तपीठ टीम

राज्याचे कॅबिनेट मंत्री आणि राष्ट्रवादी काँग्रेसचे नेते नवाब मलिक यांना अटक झाल्यानंतर आघाडीचे नेते आक्रमक झालेत. पण अखेर न्यायालयात जे होईल ते पुराव्यांच्या आधारे. दिवाळीनंतर मलिकांविरोधात कारवाई झालेल्या जमीन प्रकरणाचे फटाके ज्यांनी फोडले त्या विरोधी पक्षनेते देवेंद्र फडणवीस यांनी केलेला नवा गौप्यस्फोट गंभीर आहे. अंडरवर्ल्ड माफिया डॉन दाऊद इब्राहीम याची बहिण हसीना पारकरला ५५ लाख रुपये दिल्याचे ईडीकडे पुरावे आहेत असा दावा देवेंद्र फडणीवस यांनी केला आहे. तसं असेल तर मलिकांचं संकट वाढणार आहे. त्याचवेळी मलिकांच्या वकिलांनी केलेला पूर्वलक्ष्यी प्रभावाने कायदेशीर कारवाई करता येते का, हा मुद्दा त्यांच्या तांत्रिक बचावासाठी वरिष्ठ न्यायालयांमध्ये उपयोगी ठरण्याची शक्यता आहे.

फडणवीस पुन्हा उघड केलं संपूर्ण कनेक्शन!

“नवाब मलिक यांनी देशाच्या गद्दारांसोबत केलेला जमिनीचा व्यवहार गंभीर आहे.
ईडी आणि एनआयएनं गेल्या काही दिवसांमध्ये जॉईंट ऑपरेशन केली आहेत.
या प्रकरणी ईडीनं ९ ठिकाणी सर्च ऑपरेशन केलं.
त्यातून अनेक लिंक्स बाहेर आलेल्या आहेत.
त्यातील एक प्रकरण मंत्री नवाब मलिक यांच्याशी संबंधित आहे.
नवाब मलिक यांनी ज्या सरदार वली खान आणि सरदार पटेल यांच्याकडून जमीन घेतलीय तो हसीना पारकरचा फ्रंटमॅन आहे”, असं कनेक्शन आहे.

दाऊदच्या बहिणीला मलिकांनी ५५ लाख दिले, ईडीकडे पुरावे!

अतिक्रमण काढण्यासाठी पॉवर ऑफ अॅटर्नी मागण्यात आली आणि नंतर बदण्यात आली.
२५ लाख रुपयांचा सौदा झाला पण एकही रुपया पुढे देण्यात आले नाही.
हसीना पारकरला ५५ लाख रुपये देण्यात आले याचे पुरावे ईडीला मिळाले आहेत.
ही जमीन अंडरवर्ल्डच्या मदतीनं नवाब मलिकांना मिळाली. तसंच ते पैसे अंडरवर्ल्डला गेले, ते पैसे हसीना पारकर आणि दाऊदला मिळाले.

हा व्यवहार झाल्यानंतर मुंबईत तीन वेळा दहशतवादी हल्ले!

एखाद्या मंत्र्यांनं मुंबई बॉम्बस्फोटाच्या आरोपीकडून जमीन विकत घेण्याचं कारण काय? मोठी गोष्ट ही आहे की हा व्यवहार झाल्यानंतर मुंबईत तीन वेळा दहशतवादी हल्ले झाले आहेत.
मुंबईत जे हल्ले करतात, त्यांना आपण पैसे देणार असू तर ते निंदनीय आहे.

ईडीनं केलेली कारवाई नियमानुसारच…

म्हणून मी म्हणतोय की ईडीनं केलेली कारवाई नियमानुसारच आहे.
या प्रकरणात टेरर फंडिंग अँगल स्पष्टपणे दिसतोय.
हे संपूर्ण प्रकरण गंभीर आहे.
देशाच्या सुरक्षिततेसंबंधी महत्त्वाचं प्रकरण आहे.
कुठल्याही राजकीय पक्षानं राजकारण करु नये.
ईडीला पुढील कारवाई करु द्यावी.

मलिकांचा राजकीय पक्षानं राजीनामा घेतला पाहिजे!

मुंबई बॉम्बस्फोटाच्या आरोपीकडून जमीन घेतली जात असेल तर त्याचा राजकीय पक्षानं राजीनामा घेतला पाहिजे.
तसंच राजीनामा घेणार नाही, असं जर महाविकास आघाडीचे नेते म्हणत असतील तर मात्र देशात हा चुकीचा संदेश जाईल, जो नक्कीच चांगला नसेल.