मुक्तपीठ टीम
देशभरामध्ये पेट्रोल, डिझेल, गॅस अशा सर्वच इंधनांच्या किंमती दिवसेंदिवस भडकत आहेत. सामान्य व्यक्तीला प्रवास करणे महाग होत चालले आहे. तसेच रोजच प्रवास आवश्यक असणाऱ्या नोकरदारांनाही वाढता प्रवास खर्च जाचक ठरतोय. यातून मार्ग काढण्यासाठी आपल्या मराठी तरुणांनी भन्नाट मार्ग काढला आहे तो ई-सायकलीचा. ही ई-सायकल वेगानं, आरामात आणि फक्त पाच रुपयात शंभर किलोमीटर घेऊन जाईल, असा त्यांचा दावा आहे.
सातारा जिल्ह्यातील कराड तालुक्यातील तांबवे गावामधील अतुल आणि अमोल पाटील यांनी इलेक्ट्रॉनिक सायकल तयार केली आहे. या सायकलीला लाईट, हॉर्न आणि चोरीला जाणार नाही असा सायरन अलार्म बसवलेला आहे. या सायकलीसाठी कोणत्याही लायसेन्स, पासिंग, विमा, रजिस्ट्रेशन आदी बाबींची गरज नाही. तुमच्या घरातील सायकल असल्यास नाममात्र किंमतीमध्ये त्याला मशीन बसवून दिले जाते, असेही अतुल पाटील यांनी सांगितले.
अशा प्रकारच्या ई-सायकली नामांकित कंपन्यांही बनवतात. पण त्या प्रचंड महाग असतात. तसेच त्या सर्वत्र मिळतही नाहीत. सर्वात महत्वाचे म्हणजे त्या कमी मायलेज देतात. त्यामुळे स्वस्त मस्त प्रवास करता येत नाही. महाराष्ट्रामध्ये ग्रामीण भागातील सामान्य ग्राहकांना कमी किमतीमध्ये परवडणारी सायकल बनवण्याचा ध्यास लॉकडाऊनच्या काळामध्ये अतुल आणि अमोल या दोन भावंडांनी घेतला होता. शेतकरी कुटुंबातील अमोल काही काळ पुणे येथे नोकरी करत होते. पण स्वतःचा काहीतरी आविष्कार घडवण्याच्या जिद्दीने त्या दोघांनी ही ई-सायकल तयार केली आहे.
ज्यांचा प्रवास कमी आहे अशांसाठी कमी क्षमतेची बॅटरी वापरली आहे. तर सर्वाधिक ११० किलोमीटर एव्हरेज देणारी बॅटरी ही वेगळ्या पद्धतीची वापरली आहे. यात आणखी सुधारणेसाठी अधिक नव्याने बांधणी केली जात आहे. पर्यावरणपूरक असल्याने कोणतेही प्रदूषण नाही. तसेच बॅटरी संपल्यास पायडलचा वापर करून सायकल चालवू शकतो.
सध्या बाजारातील सायकलीचा वापर करून मशिनरी बसवली जात आहे. लवकरच नामांकित कंपन्यांकडून सुट्टे भाग घेऊन स्वतःचे मॉडेल तयार करणार असल्याचे अतुल पाटील यांनी सांगितले. साधारण पाच तासांचा कालावधी चार्जिंग साठी लागत असल्याने पाच ते सहा रुपये खर्च येतो आणि त्यावर साधारण सत्तर ते एकशे दहा किलोमीटर सरासरी मायलेज मिळत आहे. घरातील टाकाऊ बॅटरी ही पुन्हा वापरात आणण्याचाही उद्योग लवकरच उभारण्याचेही त्यांच्या डोक्यात आहे. सोलापूर जिल्ह्यातील खरेदी किंवा घरातील सायकल बनावटीबाबत अनिरुद्ध बडवे 9226227627, अमोल कुलकर्णी 9922767696 यांचेशी संपर्क करावा असे आवाहन अतुल पाटील यांनी केलं आहे.
Subscribe
