सावधान! डॉक्टरांना न विचारता कोरोनासाठी औषध घेऊ नका! एकाच कुटुंबात ८ मृत्यू, ५ अत्यवस्थ !!

मुक्तपीठ टीम

छत्तीसगड राज्यातील बिलासपूरमध्ये एकाच कुटुंबातील सातजणांचा मृत्यू झाला आहे. त्याच कुटुंबातील पाचजणांची प्रकृती चिंताजनक आहे. कोरोनापासून बचाव करण्यासाठी त्या कुटुंबाने डॉक्टरांशी न बोलताच कुणीतरी सुचवलेले औषध घेतले. पोलीस या प्रकरणाचा तपास करत आहेत. त्यांच्या तपासात मृत्यूमागील इतर शक्यताही पडताळून पाहिल्या जातील.

एकाच कुटुंबातील सातजणांचे बळी आणि पाच अत्यवस्थ असण्याची ही घटना बिलासपूरच्या सिरगीट्टी पोलीस स्टेशन परिसरात घडली आहे. कोर्मी गावात कुटुंबातील सर्वांनीच औषध आणि मोहाची दारु घेतली होती. काही वेळातच प्रत्येकाची तब्येत ढासळण्यास सुरवात झाली आणि एकामागून एक सातजण मरण पावले. उरलेले पाचही अत्यवस्थ आहेत.

या गावातील तरुण खोकल्यावरील एक हमियोपॅथीचे औषध पित असत. त्यांना कुणीतरी सांगितलेले की ते औषध मोहाच्या दारुसोबत प्यालं की कोरोनापासून बचाव होतो. त्या गैरसमजातून गेले काही दिवस गावातील अनेकांमध्ये या वेगळ्या कॉकटेलची सवय वाढली होती. मंगळवारी रात्री कोरोनापासून बचावासाठी या कुटुंबातील बाराही जणांनी तेच मिश्रण प्याले असणार, अशी शक्यता आहे.

मृतांपैकी चौघांचे अंत्यसंस्कार रात्रीच्या वेळी करण्यात आले. त्यामुळे ही बाब संशयास्पद बनली आहे. मुख्य वैद्यकीय अधिकाऱ्यांनी दिलेल्या माहितीनुसार, ते जे औषध ते प्यायले त्यात अल्कोहोलचे प्रमाण खूपच जास्त असते, ते बाधले असणार, अशी शक्यता आहे.