मुक्तपीठ टीम
तौक्ते चक्रीवादळामुळे मुंबई तसेच सागरी किनाऱ्यांवरील जिल्ह्यांत निर्माण झालेल्या परिस्थितीचा आढावा मुख्यमंत्री उद्धव ठाकरे यांनी घेतला तसेच चक्रीवादळ गुजरातकडे गेले असले तरी कोकण किनारपट्टीवर सावधगिरी बाळगण्याच्या आणि यंत्रणा सज्जच ठेवण्याचे निर्देश त्यांनी जिल्हाधिकाऱ्यांना दिले आहेत. या वादळामुळे राज्यातील हजारो घरांचं नुकसान झाले आहे. तसेच शेती आणि बागायती आणि इतर व्यवसायांचेही मोठ्या प्रमाणावर नुकसान झाले आहे. झाडे पडण्याच्या शेकडो घटना नोंदवल्या गेल्या आहेत.
या वादळामुळे एकूण ६ मृत्यू झाले असून ९ जण जखमी झाले आहेत. एकूण १२ हजार ५०० जणांना सुरक्षित स्थळी हलविण्यात आले आहे अशी माहिती आपत्ती व्यवस्थापन विभागाने दिली आहे.
मुंबईत २१ वर्षांमधील सर्वाधिक पाऊस, मच्छिमारांचे नुकसान
मुंबईतील २१ वर्षांमधील पावसाचा विक्रम मोडला आहे. सोमवारी एका दिवसात 200 मिमी पावसाची नोंद झाली. यापूर्वी सन २००० मध्ये एका दिवसात १९०.८ मिमी पाऊस पडला होता. चक्रीवादळाच्या वादळामुळे मुंबईत मोठी नासधूस झाली आहे. येथे अनेक घरांचे नुकसान झाले आहे. माहिम कोळीवाड्यासारख्या ठिकाणी मच्छिमार समाजाच्या बोटी आणि मासेमारीच्या अन्य साहित्यांचे मोठ्या प्रमाणावर नुकसान झाले आहे. एका दिवसात शेकडो झाडे उन्मळून पडली आहेत. त्यामुळे गाड्यांचेही मोठ्या प्रमाणावर नुकसान झाले आहे.
किनाऱ्यांवरील जिल्ह्यांना फटका
किनाऱ्यावरील जिल्ह्यांमध्ये नुकसान व पडझड झाली असली तरी कोरोना रुग्णालयांना वीज पुरवठा खंडित होऊ देण्यात आलेला नाही त्याचप्रमाणे पुरवठ्याची पर्यायी व्यवस्था सक्षमपणे सुरु आहे याविषयीही मुख्यमंत्र्यांनी माहिती घेतली.
रस्त्यावरील पडलेली झाडे, पडलेले विजेचे खांब तातडीने काढून तसेच अगदी गावांपर्यंत जाणारे अंतर्गत रस्तेही मोकळे करून वाहतूक सुरु राहील याची काळजी घेण्यास मुख्यमंत्र्यांनी जिल्हा प्रशासनास सांगितले. मच्छिमारांच्या काही बोटींचे नुकसान झाल्याबाबतही त्यांनी माहिती घेतली.
२ हजार ५४२ बांधकामांची पडझड
या चक्रीवादळामुळे २ हजार ५४२ घरांची अंशत: तर ६ घरांची पूर्ण पडझड झाली आहे.
अशा पडझड झालेल्या बांधकामांचा तपशील पुढीलप्रमाणे आहे
• ठाणे २४,
• पालघर ४
• रायगड १७८४
• रत्नागिरी ६१
• सिंधुदुर्ग ५३६
• पुणे १०१
• कोल्हापूर २७
• सातारा ६
ठाणे जिल्ह्यात २, रायगड ३, सिंधुदुर्ग १ असे ६ जण मरण पावले आहेत. मुंबईत ४ , रायगड आणि रत्नागिरीत प्रत्येकी २ आणि ठाण्यात १ व्यक्ती जखमी आहे. रायगड आणि रत्नागिरी येथे प्रत्येकी २ अशी ४ जनावरे मरण पावली आहेत.
मुख्यमंत्र्यांनी सबंधित जिल्ह्यांच्या पालकमंत्र्यांशी चर्चा करून त्यांनाही परिस्थितीवर लक्ष ठेवण्यास सांगितले असून कोकण विभागीय आयुक्त तसेच जिल्ह्यांच्या जिल्हाधिकारी यांच्याकडून मुख्यमंत्री सातत्याने माहिती घेत आहेत.
मुख्यमंत्र्यांची हवामान वैज्ञानिकांशी चर्चा
मुख्यमंत्र्यांनी हवामान विभागाचे ज्येष्ठ वैज्ञानिक डॉ. कृष्णानंद होसाळीकर यांच्याशीही चर्चा केली. आज (सायंकाळी ५ वाजेच्या स्थितीनुसार ) हे चक्रीवादळ मुंबईच्या किनाऱ्यापासून समुद्रात १८० किलोमीटर दूर असून दिवसभर असणारा वाऱ्याचा वेगही हळूहळू कमी होऊन ७० ते ८० किलोमीटर प्रती तास इतका होईल पुढे तो आणखी ओसरेल असे त्यांनी सांगितले. हे चक्रीवादळ आज रात्री ८ ते ११ पर्यंत गुजरातेत धडकेल. त्यावेळी तेथील वाऱ्याचा वेग हा पावणे दोनशी किमी प्रती तास इतका असू शकतो. मात्र महाराष्ट्रात परिस्थिती पूर्वपदावर येऊ लागेल असेही त्यांनी सांगितले. गेल्या ६ तासांत मुंबई उपनगरात १२० मिलीमीटर पेक्षा जास्त तर कुलाबा भागात १०० ते १२० मिलीमीटर पाऊस झाल्याची माहिती त्यांनी दिली.
मुंबईत ३ कोरोना केंद्रातील रुग्णांचे सुरक्षित स्थलांतर करण्यात आले आहे तसेच मुंबईत पडलेली झाडे व खांब काढण्याचे काम वेगाने सुरु झाले आहे अशी माहिती बृहन्मुंबई महापालिकेने दिली. चक्रीवादळामुळे ऑरेंज अलर्ट जारी करण्यात आला असून, याचा परिणाम हवाई वाहतुकीवरही झाला. मुंबईतील छत्रपती शिवाजी महाराज आंतरराष्ट्रीय विमानतळावरुन होणारी हवाई वाहतूक थांबवण्यात आली, तसेच रेल्वे वाहतुकीवर झालेल्या परिणामाची माहिती मुख्यमंत्र्यांनी संबंधित यंत्रणांकडून घेतली.
Subscribe
