मुक्तपीठ टीम
कोरोना प्रतिबंधक लसीच्या लसीकरणास शनिवार, १६ जानेवारीला सुरूवात झाली. मात्र, रविवार आणि सोमवारी लसीकरण होणार नसल्याचे आरोग्य विभाग आणि मुंबई पालिकेकडून स्पष्ट करण्यात आले आहे. कोरोना लसीकरणासाठी ऑनलाइन नोंदणी करणे गरजे आहे. ऑफलाइन नोंदणी करू नये. कोविन अॅप मार्फतच नोंदणी करण्याचे निर्देश केंद्र सरकारने दिले आहेत. पण अॅपमध्ये तांत्रिक अडथळे निर्माण झाल्याने कोरोना लसीकरण रद्द करण्यात आले आहे. तसेच कोविन अॅपबाबत तांत्रिक अडथळे दूर झाल्यानंतरच लसीकरणास सुरूवात होणार असल्याचे आरोग्य विभागाचे प्रधान सचिव डॉ. प्रदीप व्यास आणि मुंबई पालिकेचे अतिरिक्त आयुक्त सुरेश काकाणी यांनी दिली आहे.
मुंबईत शनिवारी झालेल्या लसीकरणादरम्यान काही जणांची कोविन अॅपवरून नोंदणी झाली नाही. त्यामुळे त्यांना दूरध्वनी करून लस घेण्यासाठी बोलावण्यात आले होते. शनिवारी ऑफलाइन नोंदणी केंद्राच्या निर्देशानुसार करण्यात आली होती, असे काकाणी यांनी स्पष्ट केले आहे. अॅपमधील अडचणी असल्याने आणि पुढे जाऊन नवीन लसी येतील तेव्हा नोंदणीत अडचणी येण्याची शक्यता असल्याने लसीकरण दोन दिवस होणार नाही, असे डॉ. प्रदीप व्यास यांनी सांगितले.
‘कोरोना लसीकरण मोहिमेची काल अंमलबजावणी करत असताना, या मोहिमेसाठी कार्यरत असलेल्या कोविन ॲप मध्ये तांत्रिक समस्या उद्भवत असल्याचे निदर्शनास आले. ही समस्या दूर करण्याचे प्रयत्न केंद्र शासनाकडून सुरू आहेत. कोरोना लसीकरण करत असताना संपूर्णपणे डिजिटल नोंदणी करणे सक्तीचे आहे. तांत्रिक अडचण आली असता ऑफलाइन नोंदी करण्यास शासनाने परवानगी दिली होती. तथापि, यापुढील सर्व नोंदी ॲप द्वारेच करण्याचे शासनाचे निर्देश आहेत. ही बाब लक्षात घेता, मुंबईत रविवार दिनांक १७ जानेवारी २०२१ आणि सोमवार दिनांक १८ जानेवारी २०२१ असे दोन दिवस कोरोना लसीकरण स्थगित ठेवण्यात आल्याचे मुंबई पालिकेच्या वतीने जारी करण्यात आलेल्या प्रसिद्धी पत्रकात नमूद करण्यात आले आहे.
महाराष्ट्रात आरोग्य विभागातर्फे नियोजित असलेले कुठलेही कोरोना लसीकरण सत्र रद्द करण्यात आलेले नाही. तर केंद्र शासनाच्या मार्गदर्शक सूचनांनुसार पुढील आठवड्यामध्ये चार दिवस लसीकरण सत्र आयोजित करण्यात येणार आहे, असे आरोग्य विभागाकडून स्पष्ट करण्यात आले आहे.
Subscribe
