देशातील आठ राज्यांमधील २७ जिल्ह्यांमध्ये कोरोना वाढतोय! घाबरू नका, पण काळजी घ्या!

मुक्तपीठ टीम

महाराष्ट्रात कोरोना नियंत्रणात येत असल्याने आपल्याकडे दक्षतेचे प्रमाण घटू लागले आहे. सामान्यांमध्ये ओमायक्रॉनच्या बातम्यांनॆतर काहीशी सतर्कता वाढू लागली असली तरी तेवढं गांभीर्य सर्वांमध्येच दिसतं असं नाही. अशांसाठी एक महत्वाची बातमी आहे. पण ही बातमी वाचून तुम्ही घाबरू नका, तर काळजी मात्र नक्की घ्या!

देशातील आठ राज्यांमध्ये कोरोना संसर्गाची स्थिती गंभीर आहे. केंद्रीय आरोग्य मंत्रालयाने २ ते ८ डिसेंबर दरम्यान संसर्गाचा आढावा घेत अहवाल तयार करून २७ जिल्ह्यांमध्ये कोरोना वाढत असल्याचे म्हटले आहे. यापैकी सर्वात वाईट परिस्थिती सिक्कीममध्ये आहे आणि येथे घेण्यात आलेल्या चाचण्यांमध्ये २४.८१ टक्के नमुने संक्रमित असल्याचे आढळले आहे.

त्याचबरोबर केरळमधील परिस्थितीही अत्यंत वाईट आहे. येथे नऊ जिल्ह्यांचा संसर्ग दर सर्वाधिक आहे. आताही ते १० टक्क्यांपर्यंत नोंदवले जात आहे. त्याचवेळी, ओमायक्रॉनमुळे कोरोनाची प्रकरणे वाढण्याची भीती असताना केंद्र सरकारने राज्यांना लसी, औषधांचा साठा वाढविण्याच्या आणि जास्तीत जास्त कडकपणा घेण्याच्या सूचना दिल्या आहेत.

आरोग्य मंत्रालयाचे कोरोना संसर्गाविषयी माहितीसह सूचना

• अरुणाचल प्रदेश, केरळ, मणिपूर, मिझोराम, नागालँड, पुद्दुचेरी, पश्चिम बंगाल आणि सिक्कीममध्ये परिस्थिती गंभीर आहे.
• सिक्कीमच्या दक्षिणेकडील जिल्ह्यात गेल्या एका आठवड्यात जवळपास प्रत्येक चौथ्या नमुन्यात कोरोनाची लागण झाल्याचे आढळून आले आहे.
• या राज्यांतील २७ पैकी आठ जिल्हे असे आहेत की जिथे कोरोनाचा संसर्ग होण्याचे प्रमाण १० ते २५ टक्क्यांच्या दरम्यान नोंदवले जात आहे.
• केंद्रीय आरोग्य मंत्रालयाने राज्यांना निर्देश दिले आहेत की, येथे उपचार, चाचणी, देखरेख आणि लसीकरणाबाबत कोणत्याही प्रकारे गाफील राहू नये.
• केंद्रीय आरोग्य सचिव राजेश भूषण यांनी राज्यांच्या उच्च अधिकाऱ्यांच्या बैठकीत प्रोटोकॉलमध्ये समाविष्ट आठ औषधांचा साठा वाढवण्याचे निर्देश दिले.
• ही सर्व औषधे केंद्र सरकारच्या स्टॉकमध्ये उपलब्ध आहेत. यासोबतच झोन स्तरावर बांधलेल्या गोदामातही त्यांचा साठा उपलब्ध आहे.

राज्यांनी काय केलं पाहिजे?

• आरटीपीसीआर चाचणी वाढवण्यावर भर देण्यास सांगितले आहे.
• परदेशातून येणाऱ्यांवर लक्ष ठेवण्यात निष्काळजी राहू नका.
• संक्रमित रूग्ण आणि त्यांच्या संपर्कात आलेल्यांची तपासणी आणि निरीक्षण केले पाहिजे.
• सर्व राज्यांनी कोरोना नियमांचे काटेकोरपणे पालन करण्याच्या सूचना जारी कराव्यात.

कोणत्या राज्यात कोरोनाचा किती संसर्ग?

• आरोग्य मंत्रालयाच्या अहवालानुसार, केरळमधील बहुतांश जिल्ह्यांमध्ये संसर्गाचे प्रमाण वाढत आहे.
• कोझिकोडमध्ये नऊ जिल्ह्यांमध्ये सर्वाधिक ११ टक्के संसर्ग दर आहे.
• याशिवाय, मिझोराममधील हन्नाथियाल आणि सेरछिप जिल्ह्यांमध्ये संसर्ग दर अनुक्रमे २२.३७ आणि १९.२९ टक्के आहे.
• कोलकाता, पश्चिम बंगालमध्ये ५.३८, पाँडेचेरीच्या माहे येथे ६.२४, नागालँडच्या दिमापूर येथे ५.०२ आणि मणिपूरच्या इंफाळमध्ये ५.७९ टक्के नमुने एका आठवड्यात संक्रमित आढळले आहेत.

देशात सलग दुसऱ्या दिवशी कोरोना रुग्णांची संख्या वाढली

देशात सलग दुसऱ्या दिवशी कोरोनाच्या नवीन रुग्णांची संख्या वाढली आहे. आरोग्य मंत्रालयाच्या म्हणण्यानुसार, गेल्या २४ तासांत ९,४१९ लोकांचे अहवाल पॉझिटिव्ह आले आहेत. या दरम्यान १५९ रुग्णांचा मृत्यू झाला आहे. यासह, आत्तापर्यंत देशातील कोरोनाचे एकूण रुग्ण ३,४६,६६,२४१ वर पोहोचले आहेत. सक्रिय रुग्णांची संख्या ९४,७४२ वर पोहोचली आहे. गेल्या २४ तासांत ८२५१ रुग्ण कोरोनाचे बरे झाले आहेत.

सिंगापूर धोक्याच्या यादीतून बाहेर

• भारताने सिंगापूरला ओमायक्रॉनच्या संदर्भात धोका असलेल्या देशांच्या यादीतून काढून टाकले आहे.
• या यादीत आता ब्रिटन, युरोपातील इतर देश, दक्षिण आफ्रिका, ब्राझील, बोत्सवाना, चीन, घाना, मॉरिशस, न्यूझीलंड, झिम्बाब्वे, टांझानिया, हाँगकाँग आणि इस्रायल यांचा समावेश आहे.