मुक्तपीठ टीम
विधान परिषदेच्या निकालानंतर एकनाथ शिंदे गटाने पुकारलेल्या बंडाला एक आठवडा झाला. हे सर्व आमदार आसाममधील गुवाहाटीतील रॅडिसन हॉटेलमध्ये आहेत. शिवसेनेने या आमदारांना परत आणण्यासाठी भावनिक आणि कायदेशीर असे दोन्ही प्रयत्न केले मात्र शिंदे गट आपल्या भूमिकेवर ठाम असल्याचे दिसून येत आहे. याच पार्श्वभूमीवर पुन्हा एकदा मुख्यमंत्री उद्धव ठाकरे यांनी बंडखोर शिवसेना आमदारांना आवाहन केलं आहे.
उद्धव ठाकरे यांच्याकडून बंडखोर आमदारांना आवाहन!
आपण गेल्या काही दिवसांपासून गुवाहाटी येथे अडकून पडलेले आहात. आपल्या बाबत रोज नवीन माहिती समोर येत आहे, आपल्यातील बरेच संपर्कातही आहेत आपण आजही मनाने शिवसेनेत आहात. आपल्यापैकी काही आमदारांच्या कुटुंबातील सदस्यांनी देखील संपर्क साधून आपल्या मनातील भावना मला कळवल्या आहेत, आपल्या भावनांचा मी शिवसेनेचा कुटुंबप्रमुख म्हणून आदर करतो.
कुटुंबप्रमुख म्हणून तुम्हाला मनापासून सांगतो अजूनही वेळ गेलेली नाही. माझं आपल्याला सगळ्यांना आवाहन आहे, आपण या माझ्या समोर बसा, शिवसैनिकांच्या आणि जनतेच्या मनातील संभ्रम दूर करा, यातून निश्चित मार्ग निघेल, आपण एकत्र बसून यातून मार्ग काढू. कोणाच्याही कोणत्याही भूल थापांना बळी पडू नका, शिवसेनेने जो मान सन्मान तुम्हाला दिला, तो कुठेही मिळू शकत नाही, समोर आलात बोललात तर मार्ग निघेल. शिवसेना पक्षप्रमुख आणि कुटुंबप्रमुख म्हणून आजही मला तुमची काळजी वाटत आहे. समोर येऊन बोला आपण मार्ग काढू.
Subscribe
