स्वत:चं नाव लिहिलेल्या ११ लाखाच्या पाकिटाबद्दल शिंदे म्हणाले राऊतांचीच चौकशी करा!

मुक्तपीठ टीम

सक्तवसुली संचालनालयाने (ईडी) रविवारी शिवसेना खासदार संजय राऊत यांना अटक केली. गोरेगाव पत्राचाळ घोटाळ्याप्रकरणी त्यांच्यावर ही कारवाई करण्यात आली आहे. संजय राऊत यांना ४ ऑगस्टपर्यंत ईडीची कोठडी सुनावण्यात आली आहे. दरम्यान, ईडीकडून कारवाई करताना संजय राऊत यांच्या भांडुप येथील घरातून सुमारे साडेअकरा लाखांची रोख रक्कम जप्त करण्यात आली. यातील १० लाखांच्या रकमेवर ‘एकनाथ शिंदे अयोध्या’ असा उल्लेख केल्याची माहिती समोर आली. यावर स्वत: मुख्यमंत्री एकनाथ शिंदे यांनी भाष्य केले आहे. माझी चौकशी करण्यापेक्षा, ज्यांच्या घरात पैसे सापडले आहेत त्यांची चौकशी झाली पाहिजे, असे ते म्हणाले.

जे काही सत्य असेल ते समोर येईल- एकनाथ शिंदे

• संजय राऊतांच्या घरी सापडलेल्या पैशांवर तुमचं नाव असून शिवसेनेकडून चौकशीची मागणी होत असल्याचं एकनाथ शिंदेंना सांगण्यात आलं.
• यावर ते म्हणाले माझी चौकशी करण्यापेक्षा, ज्यांच्या घरात पैसे सापडले आहेत त्यांची चौकशी झाली पाहिजे.
• संजय राऊतांची चौकशी सुरु असून जे काही सत्य असेल ते समोर येईल.

१० लाखांची रक्कम असणाऱ्या पाकीटावर एकनाथ शिंदेंचं नाव!!

• रविवारी संजय राऊत यांच्या भांडुप येथील घरी सकाळी सातच्या सुमारास ईडीने छापा टाकला.
• शिवाय दादर येथील गार्डन कोर्ट इमारतीतही ईडीकडून छापा टाकण्यात आला.
• सुमारे दहा अधिकाऱ्यांच्या या पथकाबरोबर केंद्रीय राखीव पोलीस दल (सीआयपीएफ) जवानही तैनात करण्यात आले होते.
• नऊ तास चाललेल्या या चौकशी आणि छापेमारीदरम्यान राऊत यांच्या घरी साडेअकरा लाखांची रोख रक्कम सापडली.
• यामधील १० लाखांची रक्कम असणाऱ्या पाकिटावर ‘एकनाथ शिंदे अयोध्या’ असा उल्लेख असल्याची माहिती आहे.