मुक्तपीठ टीम
महाराष्ट्रातील कोरोना लढ्याचं पंतप्रधान नरेंद्र मोदींनी कौतुक केलं असतानाच विरोधी पक्षनेते देवेंद्र फडणवीसांनी मुख्यमंत्री उद्धव ठाकरेंना पत्र लिहून आरोप केलेत. त्यामुळे वाद उसळलेला असतानाच उत्तरप्रदेशचे मुख्यमंत्री योगी आदित्यनाथ यांनाही असंच पत्र आलं आहे. मात्र, तिथं विरोधातील फडणवीसांची भूमिका भाजपाच्याच केंद्रीय मंत्र्यांनी बजावली आहे. पंतप्रधान नरेंद्र मोदी यांचे विश्वासू केंद्रीय कॅबिनेट मंत्री संतोष गंगवार यांनी योगी आदित्यनाथांना एक पत्र लिहिले आहे. त्यांना लिहिलेल्या या पत्रात गंगवारांनी उत्तरप्रदेशामधील कोरोना हाताळणीतील अनागोंदीस लक्ष्य केले आहे.
गंगवार यांनी कोरोना काळात उत्तर प्रदेशमध्ये परिस्थिती दिवसेंदिवस बिकट होत चाललेल्या परिस्थितीकडे लक्ष वेधले आहे. उत्तरप्रदेशातील सरकारी अधिकारी फोन उचलत नाहीत. व्यापारी वैद्यकीय उपकरणे दीड पट दराने विकत आहेत. रुग्णालयांमधील रुग्णांना रेफरलच्या नावाखाली फिरवले जातं. त्यांना भरती केले जात नाही आहे. त्यात काहींचा मृत्यूही ओढवत आहे, असे अनेक आरोप त्यांनी पत्रात केले आहेत.
केंद्रीय मंत्री संतोष गंगवार यांनी योगी आदित्यनाथांना लिहिलेल्या पत्रातील मुद्दे-
- केंद्रीय मंत्री असूनही बरेलीचे शहर आरोग्य अधिकारी माझा फोन उचलत नाहीत.
- उपचाराअभावी कोरोना रुग्णांची गैरसोय होत आहे. बरेलीतील सर्व खासगी रुग्णालयात कोरोना रूग्णांना भरती करण्याची सुविधा दिली पाहिजे.
- कोरोना बाधित रूग्णाला शक्य तितक्या कमी वेळात रेफरल रुग्णालयात दाखल करणे फार महत्वाचे आहे. रेफरल असूनही, पीडित रुग्णाला शासकीय रुग्णालयात पाठविण्यात येत असून, त्यांना पुन्हा जिल्हा रुग्णालयात रेफर करण्यास सांगितले जाते. रुग्ण इकडे तिकडे फिरत राहतो. त्याची ऑक्सिजन पातळी सतत घसरली जाते. हा चिंतेचा विषय आहे. बर्‍याच घटनांमध्ये, रुग्णाचा मृत्यूही झाला आहे.
- बरेलीच्या जिल्हाधिकाऱ्यांना आरोग्य सुविधा आणि कोरोना व्यवस्थापन सुधारण्यासाठी ७ मुद्दे सुचवले होते. पण त्यांनी त्याकडे लक्ष दिले नाही.
- कोरोनाचा सामना करण्यासाठी वापरली जाणारी महत्त्वाची उपकरणे व्यापारी संस्था जास्त किंमतीवर विकत आहेत. त्यामुळे या सर्व महत्त्वपूर्ण उपकरणांचा दर राज्य सरकारने ठरवावा.
- बरेलीमध्ये रिक्त ऑक्सिजन सिलिंडर्सची मोठी कमतरता आहे. यामागील मुख्य कारण म्हणजे शहरातील बरेच लोक सावधगिरी म्हणून घरात ऑक्सिजन सिलिंडर ठेवतात. अशी घरे चिन्हांकित करून, सिलिंडर ठेवणाऱ्यांवर कारवाई करुन गरजूंना ही सुविधा पुरविली पाहिजे. साठा असलेले सिलिंडर्स मनमानी दराने विकला जात आहे.
- आयुष्मान इंडियाशी जोडलेली सर्व रुग्णालयांमध्ये लस नोंदणीसह लस उपलब्ध करुन द्याव्यात. जेणेकरुन लस घेणाऱ्या व्यक्तीला जास्तीत जास्त फायदा मिळू शकेल आणि कोरोनापासून आपला बचाव करू शकेल.
- एमएसएमई अंतर्गत ऑक्सिजन प्लांट्स स्थापन करू इच्छिणाऱ्या सर्व उद्योगांना सरकारने ५०% सवलत दिली आहे. त्याच धर्तीवर, मी सुचवितो की बरेलीतील काही खासगी सरकारी रुग्णालयांनाही लवकरात लवकर ५०% सवलत द्यावी जेणेकरुन ऑक्सिजनची समस्या दूर होऊ शकेल.
Subscribe
