ओबीसी आरक्षणासाठी वंचित बहुजन आघाडीची अधिवेशनावर धडक

मुक्तपीठ टीम

राज्याच्या हिवाळी अधिवेशनाच्या दुसऱ्या दिवशी प्रकाश आंबेडकर यांच्या नेतृत्वाखाली वंचित बहुजन आघाडीने आंदोलन केले. ओबीसी जातीनिहाय जनगणना व्हावी, राज्यातलं आरक्षण वाचलं पाहिजे या मागणीसाठी हे आंदोलन करण्यात आले. यावेळी आंदोलकांकडून जोरदार घोषणाबाजी करण्यात आली.

पोलीस आणि कार्यकर्त्यांत गोंधळ

आंदोलनस्थळी अचानक शेकडो कार्यकर्त्यामुळे पोलिसांचीही तारांबळ उडाली.
पोलिसांनी जमाव पांगवायला सुरुवात केली.
तसा जमाव अधिक आक्रमक झाला.
आंदोलक अधिकच आक्रमक होत असल्याचं पाहून पोलिसांनी आधी प्रकाश आंबेडकरांची भेट घेऊन आंदोलन मागे घेण्याची विनंती केली.
पोलीस आणि आंबेडकरांची चर्चा सुरू असतानाच इकडे आंदोलकांच्या जोरजोरात घोषणाही सुरू होत्या.
या आंदोलना दरम्यान वंचित बहुजन आघाडीच्या काही कार्यकर्त्यांना ताब्यात घेतलं आहे.
यामुळे पोलीस आणि कार्यकर्ते यांच्यात गोंधळ झाला आहे.

राज्यभर हे आंदोलन घेऊन जाणार

यावेळी प्रकाश आंबेडकर यांनी ओबीसी आरक्षणावरून केंद्र आणि राज्य सरकारवर जोरदार हल्ला चढवला.
या दोन्ही सरकारांना ओबीसींना आरक्षणच द्यायचं नाहीये.
मंडल आयोगापेक्षाही आता मोठी लढाई असणार आहे. आम्ही हे आंदोलन थांबवणार नाही.
राज्यभर हे आंदोलन घेऊन जाऊ.
तालुका आणि गावपातळीपर्यंत ही लढाई लढली जाईल, असं आंबेडकर म्हणाले.
ओबीसींना राजकीय आरक्षण मिळालंच पाहिजे.
ओबीसींची जातीनिहाय जनगणना केलीच पाहिजे.
एकदा जनगणना केली तर राजकीय आरक्षणही आपोआप मिळेल, असं ते म्हणाले.
या सरकारने केवळ ओबीसीच नव्हे तर मराठा आरक्षणाचंही वाटोळं केलं आहे.
गरीब मराठ्यांना वाऱ्यावर सोडण्याचं काम या सरकारने केलं आहे, असा दावाही त्यांनी केला आहे.