निकेत पावसकर
सोमवारी ९ ऑगस्ट क्रांतीदिनी सकाळी १० वाजता हिंदमाता सिनेमा समोर भारताचे चित्रपट निर्माते स्व.दादासाहेब फाळके यांच्या दादर येथील अर्धपुतळ्या शेजारी सर्वच कलाकार “जागर रंगकर्मीचा ” हा कार्यक्रम सादरकरुन आपल्या मागण्यांमागील आक्रोश आनोख्या पध्दतीने राज्य सरकारच्या निदर्शनास आणून देणार आहेत ! देशात कोरोना महामारी सुरू होऊन गेल्या सव्वा वर्षा पासून हातावर पोट घेऊन जगणारे रंगकर्मी देशोधडीला लागले आहेत.तर असंख्य कलाकार कामाअभावी मेटाकुटीला आले आहेत.या मागण्यांच्या पूर्ततेसाठी गेल्या सहा महिन्यापासून लोकप्रिय अभिनेते विजय पाटकर, विजय राणे, संचित जाधव यांच्या नेतृत्वाखाली संपूर्ण महाराष्ट्राभर सुरू झालेले आक्रोश आंदोलन आता कलाकारांच्या वर्षोनुवर्षाच्या दशावतारावर स्थिरावले आहे.मेघा घाडगे,विजय राणे, संचित जाधव, सुभाष जाधव ,चंद्रशेखर सांडवे, हरी पाटणकर, प्रमोद मोहिते, शीतल माने ,कृष्ण कुमार गावंड,सदानंद राणे आदींनी महाराष्ट्राच्या काना कोपऱ्यात सभा घेऊन,निर्मात्यांसह, विविध पारंपरिक रंगकर्मी, चित्रपट, नाटक, मालिकां मधील कलाकार तसेच हिंदी आणि मराठी वाद्यवृंदातील वादक, गायक, निर्माते, शाहीर, तमासगीर, ढोल ताशे, बेंजो पार्टी, बुकिंग क्लार्क, नाट्य व्यवस्थापक,नाट्य वितरक,रंगमंच कामगार, तंत्रज्ञ यासर्वांना एकत्र आणून मोठे संघटन उभे केले आहे. दिनांक ५ ऑगस्ट रोजी दुपारी ३ वाजता नायगाव येथील अंकुर बुद्धविहार येथे विविध कला क्षेत्रातील संघटकांची सभा झाली. त्यावेळीअभिनेते विजय पाटकर म्हणाले, कलाकारांच्या मागण्या़वर महाराष्ट्रातील ३५ जिल्ह्यात प्रथमच एकाचवेळी आंदोलन ९ ऑगस्ट रोजी छेडले जाणार आहे.हा ऐतिहासिक योगायोग असून हे आंदोलन राजकारण आणि संस्था विरहित आहे.कोणी अध्यक्ष नाही. कोणी सेक्रेटरी नाही.हे फक्त कलाकारांनी कलाकारांसाठी सुरु केलेले हे आंदोलन आहे.तसेच अभिनेते विजय पाटकर पुढे म्हणाले,कोरोना किती काळ रहाणार हे माहीत नाही,पण या पुढे आईच्या किवा स्वतःच्या आजरात लाख दीड लाख रुपये लागले तर कधीच दुसऱ्यावर अवलंबून रहाता येऊ नये, यासाठी आता स्वतःच्या पायावर उभे रहाण्यासाठी संघटना मजबूत करावी लागणार आहे .या द्वारे कलाकारांना मी कोण आहे,याची ओळख करुन देण्याची वेळ आली आहे, असेही अभिनेते विजय पाटकर आपल्या भाषणात म्हणाले.
यावेळीसंचित जाधव यांनी सांगितले, आंदोलन कलाकारांच्या आजवरच्या उज्वल किर्तीला शोभेल असे शांततेने पार पडेल.सर्व स्तरातील कलाकारांच्या एकूण १४ मागण्या सरकारपुढे ठेवण्यात येणार आहेत.सात मागण्या लॉकडाऊन मधील भीषण समस्येवर आहेत. तसेच सात मागण्या कलाकारांच्या आयुष्यभराच्या व्यथेवर आधारीत आहेत.याप्रसंगी विजय राणे यांनी सांगितले की,सात मागण्यांमध्ये माथाडी कामगारांच्या धरतीवर रंगकर्मी बोर्ड, रंगकर्मी हमी योजनाची मागणी करण्यात आली आहे.या प्रसंगी अनेक संस्था प्रमुखांनी आंदोलनाला आपला पाठिंबा जाहीर केला आहे.अभिनेत्री मेघना घाडगे यांनी उपस्थितांचे आभार मानले.सरकारने सहानुभूतीपूर्वक या आंदोलनाचा विचार केला नाही, तर आमरण उपोषण करण्याचा इशारा या प्रसंगी देण्यात आला आहे.
Subscribe
