मुक्तपीठ टीम
अमरावती जिल्ह्यातील देवरा या गावात जन्मत: कमी वजन आणि मेंदूमध्ये झालेला संसर्ग यामुळे चिमुरड्या भाग्यश्रीची प्रकृती खूप बिघडली होती. तिला चांगल्या उपचारांची गरज होती. तिच्या उपचारासाठी यशोमतीताई ठाकुरांनी आवाहन करताच अंगणवाडी सेविका उमा वाघमारे आणि त्यांच्या टीमने वर्गणी गोळा करुन उपचार केले. आज भाग्यश्री मस्त ठणठणीत झालीय.
महिला आणि बालविकास मंत्री यशोमतीताई ठाकूर यांना हे कळल्यावर त्यांनी संवेदनशीलतेनं विषय हाताळला. त्यांनी आवाहन केल्यानंतर अंगणवाडी सेविका उमा वाघमारे यांनी पुढाकार घेतला. विविध नागरिक व कार्यकर्त्यांनी गावातून लोकवर्गणी गोळा केली. तसेच भाग्यश्रीच्या उपचारांचा खर्च करण्याची जबाबदारी उचलली. यानंतर भाग्यश्रीवर नागपूरमध्ये उपचार करण्यात आले. आता भाग्यश्रीची तब्येत चांगली झाली असून ती घरी परतली आहे.
दौऱ्यावर गेल्या असताना यशोमतीताईंनी खास वेळ काढला. त्यांनी देवरा इथे भाग्यश्रीच्या घरी जाऊन विचारपूस केली. तिच्या कुटुंबाला आर्थिक मदतही केली. त्याचबरोबर या सर्व काळात भाग्यश्रीच्या कुटुंबाला सर्वतोपरी मदत करणाऱ्या अंगणवाडी सेविका कुमारी उमा वाघमारे आणि त्यांच्या संपूर्ण टीमचे पालकमंत्र्यांनी कौतुक केले.
Subscribe
