संगीत क्षेत्रातील आयडॉल ‘इंडियन आयडॉल’ मराठीसोबत!

मुक्तपीठ टीम

काही दिवसांपूर्वी पहिल्यांदाच मराठीतही ‘इंडियन आयडॉल’ हा कार्यक्रम सुरू होणार असल्याची चर्चा सुरू होती. सोनी मराठी वाहिनीवर सुरु होणाऱ्या ‘इंडियन आयडॉल’ मराठीचे परीक्षक कोण असणार याचे उत्तर प्रेक्षकांना मिळाले आहे. संगीत क्षेत्रातील सुप्रसिध्द जोडी म्हणजेच अजय अतुल या कार्यक्रमाचे परीक्षण करणार आहेत. त्यांच्या निवडीमुळे संगीत क्षेत्रातील आयडॉल ‘इंडियन आयडॉल’ मराठीसोबत आल्यानं कार्यक्रम नक्कीच नवी उंची गाठेल, अशी अपेक्षा व्यक्त केली जात आहे.

मराठी टेलिव्हीजन इंडस्ट्रीमध्ये सातत्याने नवनवीन प्रयोग आपल्याला पाहायला मिळतात. मग मोठमोठ्या कलाकारांचे टीव्हीकडे पुनरागमन असो किंवा वेगवेगळ्या विषयांचे रिऍलिटी शोचे मराठीत आगमन असो, यातून मराठी चॅनेल मनोरंजनामध्ये अधिक व्यापक होत असल्याचे चित्र दिसून येते. बऱ्याच वेळा लोकल टू ग्लोबल लोकप्रिय कार्यक्रमांच्या मराठी आवृत्त्याही प्रदर्शित केल्या जातात. त्यांपैकीच एक कार्यक्रम म्हणजे ‘इंडियन आयडॉल’! ‘इंडियन आयडॉल’ भारतातही लोकप्रिय कार्यक्रम आहे. हिंदीमध्ये त्याचे १२ सीजन झाले आहेत. या कार्यक्रमाची लोकप्रियता पाहता हाच प्रयोग आता मराठीतही करण्यात येणार आहे. सोनी मराठी वाहिनीवर लवकरच ‘इंडियन आयडॉल’ मराठी हा कार्यक्रम सुरु होणार आहे.

अजय-अतुल घेऊन येत आहेत मराठीतला ग्रँड रियालिटी शो, ‘इंडियन आयडल मराठी’!
अभिमान देशाचा, आवाज महाराष्ट्राचा!
‘इंडियन आयडल मराठी’ आपल्या सोनी मराठी वाहिनीवर. #इंडियनआयडलमराठी | #IndianIdolMarathi #सोनीमराठी | #SonyMarathi #विणूयाअतूटनाती | #VinuyaAtutNati @AjayAtulOnline pic.twitter.com/349p3RmN11

— Sony मराठी (@sonymarathitv) October 1, 2021

भव्य वॉलपेंटिंगद्वारे घोषणा

‘इंडियन आयडॉल’ मराठीचे परीक्षण कोन करणार हे जाणून घेण्याची उत्सुकता प्रेक्षकांना होती.
सोनी मराठी कडून भव्य वॉलपेंटिंगद्वारे याबाबत घोषणा करण्यात आली.
सुप्रसिद्ध संगीतकार अजय अतुल या कार्यक्रमाचे परीक्षण करणार आहेत.
अजय अतुल यांचा फोटो असलेल्या भव्य वॉलपेंटिंग द्वारे सोनीकडून परीक्षकांची घोषणा करण्यात आली आहे.
हिंदी टीव्ही इंडस्ट्रीमध्ये ‘इंडियन आयडॉल’ हा कार्यक्रम लोकप्रिय आहे.
‘इंडियन आयडॉल’चा मराठीमधील हा पाहिलाच प्रयोग आहे.
हिंदी प्रमाणेच ‘इंडियन आयडॉल’ मराठीला देखील प्रेक्षकांचा भरघोस प्रतिसाद मिळेल अशी आशा आहे.

‘इंडियन आयडॉल’च्या मराठीतील या प्रयोगास प्रेक्षकांच्या भरघोस प्रतिसादाची अपेक्षा आहे. लोकप्रिय परीक्षकांसोबत महाराष्ट्रातील टॅलेंटचा आस्वाद या कार्यक्रमातून घेता येणार आहे. अजय अतुल ही संगीतकारांची जोडी प्रथमच रिऍलिटी शोमध्ये परीक्षण करणार आहेत.

अजय अतुल यांचे लोकप्रिय संगीत

जोगवा (मराठी)
नटरंग (मराठी)
सैराट (मराठी)
अग बाई अरेच्चा (मराठी)
लय भारी (मराठी)
अग्निपथ (हिंदी)
सिंघम (हिंदी)
तुंबाड (हिंदी)

सैराट हा चित्रपट जितका लोकप्रिय आहे, तितकेच लोकप्रिय त्याचे संगीतदेखील आहे. अजय अतुल यांनी सैराटच्या संगीतासोबत मराठीतला पहिला आणि अभिमानास्पद प्रयोग केला. तो म्हणजे सैराट मधील ‘याड लागलं’ या गाण्याची सिंफनी लॉस अँजलस येथे रेकॉर्ड करण्यात आली आहे. सैराटच्या निमित्ताने पहिल्यांदा एका भारतीय चित्रपटाच्या गाण्याचे सिंफनी ऑर्केस्ट्रा हॉलीवूड येथे रेकॉर्डिंग झाले. या दिवसासाठी ३० वर्ष वाट पहावी लागली असे अजय अतुल यांनी एका मुलाखतीदरम्यान सांगितले होते. एका मराठी चित्रपटासाठी हे घडून येणे अत्यंत अभिमानाची गोष्ट मानली गेली. अजय-अतुल यांचे सैराट प्रमाणेच मराठीतील इतरही अनेक अल्बम लोकप्रिय आहेत. जोगवा या मराठी चित्रपटाच्या संगीतासाठी अजय-अतुल यांना नॅशनल अवॉर्ड मिळाले आहे. मराठी सोबतच त्यांनी हिंदी मध्ये देखील अनेक चित्रपटांचे संगीत दिग्दर्शन केले आहे. अशा या लोकप्रिय आणि हरहुन्नरी गायकांच्या जोडीचे परीक्षण ‘इंडियन आयडॉल’ मराठी मध्ये पाहायला मिळणार आहे, प्रेक्षकांसाठी ही मेजवानी असणार आहे.