मुक्तपीठ टीम
गुजरातमधील कांडला बंदरात सापडलेल्या १,४३९ कोटींच्या हेरॉइन प्रकरणातील आरोपीला अटक करण्यात आली आहे. हा आरोपी नोदंणीकृत आयातदार म्हणजे इंपोर्टर आहे. तो उत्तराखंडच्या पत्त्यावर सापडला नाही. अखेर तो पंजाबमधील एका गावात लपल्याची माहिती मिळाली. तेथून त्याला अटक कण्यारत आली आहे.
गुजरातच्या दहशतवाद विरोधी पथकाच्या (एटीएस) अधिकाऱ्यांबरोबर संयुक्तपणे विकसित केलेल्या माहितीच्या आधारे, महसूल गुप्तवार्ता संचालनालयाचे (डीआरआय) अधिकारी सध्या कांडला बंदर इथे उत्तराखंड स्थित कंपनीने आयात केलेल्या मालाची तपासणी करत आहेत. इराणच्या अब्बास बंदरातून १० हजार ३१८ बॅगांची ही खेप कांडला बंदरात आली होती. सतरा कंटेनरमधून आयात केलेल्या मालाचे एकूण वजन २९४ मेट्रिक टन आहे आणि ती “जिप्सम पावडर” असल्याचे सांगितले होते.
आतापर्यंत १,४३९ कोटी रुपये किंमतीचे २०५.६ किलो अवैध हेरॉईन जप्त करण्यात आले आहे. मालाची सखोल तपासणी अजूनही बंदरात सुरू आहे.
तपासादरम्यान, आयातदार उत्तराखंडमधील नोंदणीकृत पत्त्यावर सापडला नाही. त्यामुळे आयातदाराला पकडण्यासाठी देशभरात मोहीम सुरू करण्यात आली. आयातदाराचा ठावठिकाणा शोधण्यासाठी डीआरआयने भारतभर विविध ठिकाणी छापे टाकले. ओळख टाळण्यासाठी आयातदार सारखी ठिकाणे बदलत होता आणि लपत होता. मात्र अखेर सातत्यपूर्ण प्रयत्नांना यश आले आणि पंजाबमधील एका लहान गावात हा आयातदार सापडला. आयातदाराने प्रतिकार करून पळून जाण्याचा प्रयत्न केला, मात्र डीआरआयच्या अधिकाऱ्यांनी त्याला पकडले.
आतापर्यंत केलेल्या चौकशीच्या आधारे, डीआरआयने या आयातदाराला एनडीपीएस कायद्याच्या तरतुदींअंतर्गत अटक केली आणि त्याला २३ एप्रिल रोजी अमृतसरच्या विशेष दंडाधिकारी यांच्या न्यायालयात हजर करण्यात आले . डीआरआय अधिकाऱ्यांना या आयातदाराला भुज येथील न्यायालयासमोर हजर करता यावे यासाठी न्यायालयाने ट्रान्झिट रिमांड मंजूर केला आहे. या प्रकरणाचा पुढील तपास सुरू आहे.
Subscribe
