मुक्तपीठ टीम
केंद्रीय तपास यंत्रणांच्या कारवायांवरून राज्यात महाविकास आघाडी सरकार आणि भाजापमध्ये आरोप-प्रत्यारोप सुरू आहे. भाजपाच्या मदतीने केंद्रीय तपास यंत्रणांकडून आघाडीच्या काही नेत्यांवर कारवाई सुरू असल्याचा आरोप करण्यात येतो. दरम्यान राज्यातील एका भाजपा नेत्याविरोधात ठाणे लाचलुचपत प्रतिबंधक विभागाने गुन्हा दाखल केला आहे. भाजपाचे माजी आमदार नरेंद्र मेहता यांच्यावर त्यांच्या उत्पन्नापेक्षा जास्त मालमत्ता जमवल्याचा आरोप आहे. या गुन्ह्यात त्यांची पत्नी सुमन मेहता यांना सहआरोपी करण्यात आले आहे.
नेमकं प्रकरण काय आहे?
- नरेंद्र मेहता यांनी बेकायदेशीर मार्गाने संपत्ती जमा केली असल्याची तक्रार लोकायुक्तांकडे करण्यात आली होती.
- त्यानंतर मेहता यांच्याविरोधात चौकशी सुरू करण्यात आली.
- लोकसेवकपदाचा आणि अधिकाराचा दुरुपयोग करून त्यांनी उत्पन्नापेक्षा ८ कोटी २५ लाख ५१ हजार ७७३ रुपये एवढी अधिक मालमत्ता, संपत्ती जमा केली असल्याचा आरोप आहे.
- त्याशिवाय, त्यांची पत्नी सुमन मेहता यांनी लोकसेवक नरेंद्र मेहता यांनी गैरमार्गाने जमवलेल्या केलेल्या मालमत्तेचा विनियोग करण्यास मदत केल्याचाही ठपका त्यांच्या पत्नीवर आरोप आहे.
- याप्रकरणी लाचलुचपत प्रतिबंधक विभागाच्या तक्रारीवरून नरेंद्र मेहता आणि सुमन मेहता यांच्याविरोधात नवघर पोलीस ठाण्यात गुरुवारी गुन्हा दाखल करण्यात आला.
- लाचलुचपत प्रतिबंधक विभागाने नवघऱ पोलीस ठाण्यात भ्रष्टाचार अधिनियम १९८८चे कलम १३ (१) (इ), १३(२) सह भादंवि संहिता कलम १०९ नुसार गुन्हा दाखल केला.
- गुन्हा दाखल झाल्यानंतर गुरुवारी संध्याकाळनंतर लाचलुचपत प्रतिबंधक विभागाने मेहता यांचे घर आणि कार्यालयाची झडती घेतली.
कोण आहेत नरेंद्र मेहता?
- मिरा-भाईंदर भागामध्ये नरेंद्र मेहता हे भाजपाचे महत्त्वाचे नेते आहेत.
- मागील विधानसभा निवडणुकीत त्यांना बंडखोरीचा फटका बसल्याने थोडक्यात पराभव झाला होता.
- माजी आमदार नरेंद्र मेहता १ जानेवारी २००६ ते ३१ ऑगस्ट २०१५ या कालावधीत मीरा भाईंदर महापालिकेचे नगरसेवक होते.
- त्याशिवाय मीरा भाईंदर विधानसभा मतदारसंघाचे आमदार होते.
Subscribe
