*मनोरंजन महत्त्वाचे*: १) ‘माझ्या नवऱ्याची बायको’ ही झी वाहिनीवरील लोकप्रिय मालिका लवकरच निरोप घेणार, अशी चर्चा अनेक दिवसांपासून सुरू होती. या मालिकेने शेवटी काल म्हणजेच ७ मार्चला सगळ्यांचा निरोप घेतला आहे. काल या मालिकेचा शेवटचा भाग पाहण्यास मिळाला. २) अभिनेत्री सोनाक्षी सिन्हाने एक खाकी वर्दीतील फोटो शेअर करत आनंदाची बातमी दिली आहे. ती डिजिटल पदार्पण करत असल्याचे जाहीर केले आहे. सोनाक्षी लवकरच अ‍ॅमेझॉन प्राईमवरील एका वेब सीरिजमध्ये मुख्य भूमिकेत झळकणार आहे. या वेब सीरिजमध्ये ती एका महिला पोलिसाची भूमिका साकारत आहे. ३) लवकरच प्रेक्षकांच्या भेटीस येणारा नवा चित्रपट ‘राम सेतू’चे पहिले पोस्टर प्रदर्शित झाले होते. हे पोस्टर पाहून प्रेक्षकांच्या मनात या चित्रपटाबाबत प्रचंड उत्सुकता निर्माण झाली आहे. या चित्रपटात अक्षय कुमारसोबत अभिनेत्री जॅकलिन फर्नांडिस आणि नुसरत भरुचा दिसणार आहेत. ४) ‘जॉबलेस’ या नावाची वेबसीरिज लवकरच प्रेक्षकांच्या भेटीस येणार आहे. या सीरिजच्या पटकथेत सस्पेंस क्राईम थ्रिलर पाहण्यास मिळणार आहे. ‘जॉबलेस’ची कथा ही एका सर्वसाधारण मध्यमवर्गीय मराठी माणसाची आहे. सध्या या सीरिजच्या शुटींगची सुरूवात झाली आहे. ५) गँगस्टर अरुण गवळी यांची मुलगी योगिता हीचे लग्न अभिनेता अक्षय वाघमारेशी झाले आहे. लॉकडाउनच्या कळात त्यांनी लग्न केले होते. त्यांच्याकडे लवकरच नव्या पाहुण्याचे आगमन होणार आहे. अरुण गवळी आजोबा होणार आहेत. अभिनेता अक्षयने त्याच्या सोशल मीडियावर योगिताच्या डोहाळे जेवणाचा एक व्हिडीओ शेअर केला आहे.

क्रीडा थोडक्यात: १) स्विस खुल्या सुपर ३०० स्पर्धेच्या महिला एकेरीच्या अंतिम सामन्यात ऑलिम्पिक रौप्यपदक विजेत्या पी. व्ही. सिंधूचा स्वित्झर्लंडच्या अग्रमानांकित कॅरोलिना मरिनपुढे निभाव लागला नाही. मरिनने केवळ ३५ मिनिटांत सिंधूला पराभवाची धूळ चाखली. मरिनने अंतिम सामन्यात आक्रमक खेळाचे प्रदर्शन करीत २१-१२, २१-५ अशा फरकाने सिंधूला नमवले. त्यामुळे सिंधूला उपविजेतेपदावरच समाधान मानावे लागले. २) भारतीय महिला क्रिकेट संघाने जवळपास वर्षभरानंतर पहिला आंतरराष्ट्रीय समाना खेळला. मात्र, या सामन्यात दक्षिण आफ्रिकेने भारताचा आठ गडी राखून धुव्वा उडवला. भारताने ५० षटकांत ९ बाद आणि १७७ धावा केल्या होत्या, तर दक्षिण आफ्रिकेने भारतीय संघाने उभी केलेली धावसंख्या ४०.१ षटकांत २ बाद १७८ धावा करत पार केली आणि पहिल्या एकदिवसीय सामना आपल्या नावे केले. ३) आयपीएलमध्ये सर्वाधिक पाच वेळा विजेतेपद पटकवणारा मुंबई इंडियन्स संघ यावर्षी जेतेपदाचा षटकार मारण्यासाठी मैदानात उतरणार आहे. त्यांची पहिली लढत भारतीय संघाचा कर्णधार विराट कोहलीच्या रॉयल चॅलेंजर्स बेंगळुरूशी होणार आहे. तसेच या हंगामात मुंबईचा संघ चेन्नई सुपर किंग्ज संघाच्या घरच्या मैदान असलेल्या चेपॉत मैदानावर सर्वाधिक पाच सामने खेळणार आहे. तर दिल्ली ४, बेंगळुरूत ३ आणि कोलकत्तामध्ये २ समाने खेळले जाणार आहेत. ४) मॅट्टेओ पेलिकोन कुस्ती स्पर्धेत भारताची आघाडीची कुस्तीपटू विनेश फोगटने महिलांच्या ५३ किलो वजनी गटात सुवर्णपदकाची कमाई केली आहे. तसेच सुवर्णपदकाची कमाई करत ती या वजनी गटाच्या जागतिक क्रमवारीतही अग्रस्थानी झेप घेतली आहे. अंतिम फेरीत विनेशने कॅनडाच्या डायना मेरीचा ४-० असा पराभव केला.