मुक्तपीठ टीम
पदवी पाहिजे मला…मनात ठाण निर्धार. त्याला अभ्यासाच्या कृतीची जोड. त्यातूनच अखेर मिळवली पदवी. खरंतर राजकारण हा फुलटाइम जॉब. ओव्हटाइम तर ठरलेलाच. तरीही मंत्रिपदाच्या व्यापातून, व्यग्र वेळापत्रकातून वेळ काढून नगरविकासमंत्री एकनाथ शिंदे यांनी बीएची परीक्षा दिली आणि पदवीही मिळवली.
परिस्थितीमुळे एकनाथ संभाजी शिंदे यांना शिक्षण अर्धवट सोडावे लागले. पण मनात शिक्षणाची जिद्द आणि तळमळ कायम होती. त्यामुळे संधी मिळताच त्यांनी यशवंतराव चव्हाण मुक्त विद्यापीठात नाव नोंदवले. सलग तीन वर्षे चिकाटीने अभ्यास करून गेल्या वर्षी ते बीए परीक्षेत उत्तीर्ण झाले होते. गेल्या वर्षी कोरोनामुळे ही परीक्षा ऑनलाइन पद्धतीने झाली होती. मराठी आणि राजकारण (प्रत्येकी तीन पेपर) असे दोन विषय घेऊन एकनाथ शिंदे अंतिम वर्षाच्या परीक्षेला बसले होते. ७७.२५ टक्के गुण मिळवून ते उत्तीर्ण झाले होते.
या परीक्षेचा पदवीदान समारंभही करोनामुळे व्हर्च्युअल पद्धतीनेच झाला. राज्यपाल भगतसिंग कोश्यारी यांच्या अध्यक्षतेखाली झालेल्या या सोहळ्यात कुलगुरू प्रा. ई. वायूनंदन आणि कुलसचिव डॉ. दिनेश भोंडे यांच्या हस्ते उत्तीर्ण विद्यार्थ्यांना गौरवण्यात आले. शिंदे यांच्यासह गोंदिया येथील शैलेश चुटे, मुंबईतील सईद रुखसार फातेमा सईद अहमद, निकेश कुऱ्हाडे या विद्यार्थ्यांना प्रातिनिधिक स्वरुपात गौरवण्यात आले. या सोहळ्यात २०१९ आणि २०२० या दोन वर्षांत विविध विद्याशाखेतील विद्यार्थ्यांना पदविका, पदव्युत्तर पदविका, पदवी, पदव्युत्तर पदवी, एम फिल, पीएचडी पदवी प्रदान करण्यात आली.
पाहा व्हिडीओ:
Subscribe
