मुक्तपीठ टीम
मुख्यमंत्री एकनाथ शिंदे आजपासून नाशिकमधून आपल्या महाराष्ट्र दौऱ्याला सुरुवात करणार आहेत. मुख्यमंत्री पदाची शपथ घेतल्यानंतर शिंदे यांच्या पहिल्याच दौऱ्याकडे सर्वांचे लक्ष लागून आहे. दरम्यान नुकत्याच झालेल्या युवासेनाप्रमुख आदित्य ठाकरे यांच्या शिवसंवाद यात्रेला चांगलाच प्रतिसाद मिळाला होता. आदित्य ठाकरे यांनी नाशिक, अहमदनगर, औरंगाबादसह काही जिल्ह्यांचा दौरा केला होता यावेळी त्यांनी बंडखोर आमदारांवर कडाडून टीका केली होती. आता त्याच जिल्ह्यांत मुख्यमंत्री एकनाथ शिंदेही मोठी मोहीम सुरू करणार आहेत.
आदित्य ठाकरे यांच्या संवाद यात्रेचा पहिला टप्पा भिवंडीतून सुरू होऊन शिर्डीत संपला. यामध्ये नाशिक, औरंगाबाद आणि अहमदनगर जिल्ह्यांचाही समावेश आहे. आता त्यांचा सावंतवाडी आणि कोल्हापूरचा पुढील दौरा १ ऑगस्टपासून सुरू होत आहे. विशेष म्हणजे या भेटीदरम्यान आदित्य ठाकरे यांनी बंडखोर आमदारांवर टीका केली होती. येथे शिंदेही बंडखोर आमदारांच्या विभागात सभा घेणार आहेत.
२९ जुलैपासून सुरू होणाऱ्या यात्रेदरम्यान मुख्यमंत्री शिंदे नाशिक जिल्ह्यातील मालेगावमध्ये अनेक प्रकल्पांचे लोकार्पण करणार आहेत. त्याचबरोबर यानंतर पत्रकार परिषदही घेणार आहेत. या दौऱ्याला राजकीय पार्श्वभूमी असल्याचं बोललं जात आहे. मुख्यमंत्री नाशिकऐवजी थेट मालेगाव तालुक्याचा नियोजित दौरा करणार आहेत. शिवसेनेचे खासदार हेमंत गोडसे, दादा भुसे आणि सुहास कांदे हे आमदार शिंदे गटात सामील झाल्यानंतर नाशिकमध्ये शिवसेना कमकुवत झाल्याचे चित्र आहे. यामुळे आदित्य ठाकरे यांनी मालेगाव दौरा केला. आदित्य ठाकरे यांनी तर तिन्ही बंडखोरांवर चांगलीच टीका केली. त्यामुळे दादा भुसे आणि सुहास कांदे यांना बळ देण्यासाठी मुख्यमंत्री एकनाथ शिंदे थेट मालेगावात येणार आहेत.
औरंगाबाद जिल्ह्यात मुख्यमंत्र्यांची आढावा बैठक होणार आहे. यानंतर ते अब्दुल सत्तार यांच्या सिल्लोड मतदारसंघात जाऊन अनेक विकासकामांचा शुभारंभ करणार आहेत. येथे ते एका जाहीर सभेला उपस्थित राहणार आहेत. यानंतर ते औरंगाबाद मध्यचे आमदार प्रदीप जैस्वाल, औरंगाबाद पश्चिमचे आमदार संजय शिरसाट, संदीपान भुमरे यांची कार्यालयांना भेट देतील. आणि भारतीय जनता पक्षाचे आमदार अतुल सावे यांची भेट घेण्यासाठी मुंबईला रवाना होतील.
Subscribe
