मुक्तपीठ टीम
अभिनेता रणवीर सिंहने देशातील सर्वात मोठ्या निवासी अपार्टमेंट डीलमध्ये वांद्र्याच्या उपनगरात ११९ कोटी रुपयांना एक आलिशान फ्लॅट खरेदी केला आहे. रणवीरच्या या नवीन घरातून समुद्राचे अतिशय सुंदर मनमोहक दृश्य पाहायला मिळते. अभिनेत्याने शाहरुख खानचा बंगला ‘मन्नत’ आणि सलमान खानचा ‘गॅलेक्सी अपार्टमेंट’ यांच्या मधली बँडस्टँडमधील ‘सागर रेशम’ या इमारतीचा १६वा, १७वा, १८वा आणि १९वा मजला विकत घेतला आहे.
ओह फाइव्ह ओह मीडिया वर्क्स एलएलपी कंपनीचे संचालक म्हणून सिंह आणि त्यांचे वडील जुगजीत भवनानी सिंह यांनी पुनर्बांधणीचे काम सुरू असलेल्या इमारतीत एक अपार्टमेंट विकत घेतले आहे. अभिनेत्याच्या पसंतीनुसार बिल्डर चार मजली बांधकाम करेल, असे या करारात मान्य झाल्याचे सूत्रांनी सांगितले. सिंह यांच्या प्रतिनिधींना पाठवलेल्या प्रश्नांना कोणताही प्रतिसाद मिळाला नाही.
सूत्रांनी सांगितले की, व्यवहारासाठी ७ कोटी रुपयांपेक्षा जास्त मुद्रांक शुल्क भरण्यात आले आहे, ज्यामध्ये ११ हजार २६६ चौरस फूट जागा, एक विशेष १ हजार ३०० चौरस फूट टेरेस आणि १९ पार्किंग लॉटचा समावेश आहे. प्रति चौरस फूट किंमत सुमारे एक लाख रुपये आहे. रणवीर आणि दीपिका पदुकोण यांचे हे क्वाड्रप्लेक्स मुख्य घर असण्याची शक्यता आहे.
रणवीर आणि दीपिका जवळजवळ तीन वर्षांपासून जुहू आणि वांद्रे भागात एक स्वतंत्र बंगला शोधत होते, जेथे अनेक सेलिब्रिटी राहतात. गेल्या वर्षी या जोडप्याने २२ कोटी रुपयांना अलिबागमध्ये दुसरे घर विकत घेतले. सध्या ‘सागर रेशम’मध्ये एवढी मोठी नावे नाहीत जी या स्टार जोडीचे शेजारी असतील. रिअल इस्टेट कन्सल्टन्सी फर्म जेएलएल इंडियाच्या निवासी सेवांचे वरिष्ठ संचालक आणि प्रमुख रितेश मेहता यांच्याशी संपर्क साधला असता, त्यांनी सांगितले की, अभिनेत्याने दिलेली रक्कम बाजाराच्या ट्रेंडनुसार आहे. या ठिकाणी मालमत्तेची किंमत ९० हजार रुपये ते १.१० लाख रुपये प्रति चौरस फूट आहे.
Subscribe
